मंगळवार, ८ ऑक्टोबर
संगमनेरमध्ये बहुतांशी रुग्णालयाशी संलग्न असलेल्या औषध दुकानांमधून (medical Store) औषध घेण्याची सक्ती रुग्ण, रुग्णांच्या नातेवाईकांना केली जाते. या औषध दुकानातून छापील किमतीवर औषधांची विक्री केली जात असल्याने रुग्ण आणि त्यांच्या नातेवाईकांना मोठा आर्थिक भार सहन करावा लागतो. या उलट रुग्णालयाशी संलग्न नसलेल्या अनेक औषधांच्या दुकानातून औषधांवर दहा ते पंचवीस ते टक्क्यांपर्यंत सवलत दिली जात असल्याने अशा प्रकारची सवलत सामाजिक बांधिलकी जोपासत रुग्णालयांशी संलग्न औषध दुकानातून देण्याची मागणी शिवसेनेचे (उद्धव बाळासाहेब ठाकरे) संगमनेर शहर संघटक तथा युवा सेना उपजिल्हा समन्वयक रवींद्र कानकाटे यांनी केली आहे.
रुग्णालयांशी संघटना असलेल्या औषध विक्रेत्यांनी अशा प्रकारची सवलत रुग्ण आणि रुग्णांच्या नातेवाईकांना दिली गेली नाही तर शिवसेना या प्रश्नावर मोठे जन आंदोलन उभे करेल, असा देखील इशारा कानकाटे यांनी दिला आहे. रुग्णालयाशी संलग्न नसलेले औषध विक्रेते ही सवलत देऊ शकतात तर हजारो लाखो रुपयांची बिले करणाऱ्या रुग्णालयाशी संलग्न असलेल्या औषध दुकानांना हे सहज शक्य असल्याने त्यांनी याचा गांभीर्याने विचार करण्याची मागणी देखील करण्यात आली आहे.
आधीच सरकारी रुग्णालयांची वानवा असलेल्या संगमनेरमध्ये खासगी रुग्णालयांचे जाळे मोठ्या प्रमाणात पसरले आहे. नवीन नगर रस्त्यासह शहराच्या बहुतांशी भागात आता मोठमोठाली रुग्णालये उभी राहिली आहे. रुग्णालयाशी संलग्न असलेल्या या औषध दुकानांमधून औषध घेण्याची अप्रत्यक्ष सक्ती असल्याने खाजगी औषध दुकानांच्या तुलनेत रुग्णांचा खिसा मोठ्या प्रमाणात कापला जात असल्याचे समोर आहे येत आहे.
सरकारी रुग्णालय नसल्याने रुग्णांना खाजगी रुग्णालयाची पायरी चढावी लागते. त्यामुळे आधीच कोणत्याही शासकीय उपचार योजनेचा लाभ घेण्यापूर्वीच रुग्णांचा रुग्णाच्या नातेवाईकांचा खिसा कापला जातो. हजारो लाखो रुपयांची बिल रुग्णांच्या माथी मारली जातात. संगमनेरातील बहुतांशी रुग्णालय आर्थिक बाबतीत ‘कत्तलखाने’ म्हणून ओळखले जातात. जवळपास सर्वच बड्या रुग्णालयांमध्ये औषध दुकाने उपलब्ध आहेत.
रुग्ण उपचारासाठी दाखल होतात थेट ऑनलाइन पद्धतीने या औषध दुकानांमध्ये डॉक्टर अथवा त्यांच्या स्टाफकडून ऑनलाइन पद्धतीने औषधांची चिठ्ठी पाठविली जाते. आणि रुग्णाला संबंधित औषध दुकानातून औषध आणण्यास सांगितली जातात. त्यामुळे औषध दुकानातून घेतलेली औषध आपल्याच रुग्णाला वापरली जातात का? याबाबत साशंकता असताना मोठ्या प्रमाणात औषधांची बिल रुग्ण अथवा त्यांच्या नातेवाईकांना द्यावी लागतात.
चार -पाच दिवसांसाठी रुग्ण उपचारासाठी रुग्णालयात ॲडमिट असला, छोट्या मोठ्या शस्त्रक्रिया झाल्या तरी प्रत्यक्षात हजारो, लाखो रुपयांमध्ये त्याला औषधांसह रुग्णालयाची बिल भरावी लागतात. अशा परिस्थितीत त शहरातील रुग्णालयाशी संलग्न नसलेल्या औषध दुकानदारांकडून औषध घेतल्यास मोठ्या प्रमाणात त्यांना बिलामध्ये सवलत मिळत असते. थोड्या फार प्रमाणात बिलाची रक्कम असेल तर याचा फारसा विचार न करता हे बिल दिली जातात, मोठ्या प्रमाणात औषधाचे बिल होत असल्याने ही सवलत या रुग्णालयांशी संलग्न औषध दुकानातून दिली जावी. यातून रुग्ण अथवा त्यांच्या नातेवाईकांचे हजारो रुपये वाचतील आणि आजारपणात त्यांना आर्थिकदृष्ट्या दिलासा मिळेल.
औषध निरीक्षकांकडे (Drug Inspector) देखील केली मागणी…
शहरातील खासगी औषध विक्रेत्यांप्रमाणे रुग्णालयाशी संलग्न असलेल्या औषध विक्रेत्यांनी देखील सामाजिक बांधिलकी जोपासत रुग्ण, त्यांच्या नातेवाईकांना औषधांच्या बिलामध्ये सवलत द्यावी. यामुळे रुग्णांना आर्थिक दिलासा मिळेल यासाठी अहमदनगरचे औषध निरीक्षक हेमंत मेटकर यांच्याकडे देखील यासंबंधीची तक्रार करण्यात आली आहे. – रवींद्र कानकाटे, शिवसेना (उबाठा) शहर संघटक तथा युवा सेना उपजिल्हा समन्वयक.
