मंगळवार, १५ ऑक्टोंबर
येत्या २६ नोव्हेंबरला महाराष्ट्राच्या विधानसभेची मुदत संपत आहे. त्यामुळे निवडणूक आयोगाने सोमवारी केंद्रीय निवडणूक आयोगाने महाराष्ट्राच्या निवडणुकीचा कार्यक्रम जाहीर केला असून एकाच टप्प्यात २० नोव्हेंबरला निवडणूक घेण्यात येणार आहे. तर २३ नोव्हेंबरला मतमोजणी होणार असून महाराष्ट्राची सत्ता कोणाच्या हातात जाणार हे स्पष्ट होईल.
दीपावली पूर्वीच राज्यात आदर्श आचारसंहिता लागू झाल्याने तसेच ऐन दीपावली दरम्यान निवडणूक कार्यक्रम सुरू राहणार असल्याने मतदारांची देखील दिवाळी गोड होण्याची चिन्ह आहे. २९ ऑक्टोंबर ते ४ नोव्हेंबर दरम्यान दीपावली सणाचा जल्लोष राहणार असल्याने याच दरम्यान उमेदवारी अर्ज भरण्याची तसेच मागे घेण्याची अखेरची तारीख असल्याने ऐन दिवाळीत आता निवडणुकीचा देखील माहोल रंगणार आहे. त्यातच राज्यभरात एकाच दिवशी निवडणूक होणार असल्याने राजकीय नेत्यांचे देखील निवडणूक प्रचारासाठी मोठी धावपळ उडताना दिसेल.
केंद्रीय निवडणूक आयुक्त राजीव कुमार यांनी पत्रकार परिषद घेत जाहीर केलेलं निवडणुकीचे वेळापत्रक अस आहे…
निवडणुकीच्या नोटिफिकेशन – २२ ऑक्टोंबर २०२४
अर्ज दाखल करण्याची शेवटची तारीख – २९ ऑक्टोंबर २०२४
अर्जाची छाननी – ३० ऑक्टोंबर २०२४
अर्ज मागे घेण्याची मुदत – ४ नोव्हेंबर २०२४
मतदान – २० नोव्हेंबर २०२४
मतमोजणी – २३ नोव्हेंबर २०२४
