बुधवार, १६ ऑक्टोंबर
नाशिक – तक्रारदाराला ओमनी गाडीवर सोडा विक्रीचा व्यवसाय करू देण्यासाठी आणि कोणतीही कारवाई न करण्यासाठी चार हजार रुपयांची लाच घेणाऱ्या पोलीस हवालदाराला एसीबीच्या (अँटी करप्शन) अधिकाऱ्यांनी रंगेहात पकडले.
एजाझ काझी असे लाचखोर पोलीस हवालदाराचे नाव असून ते धुळे जिल्ह्यातील देवपूर पोलीस ठाण्यात कार्यरत आहे. कार्यालयातच लाच स्वीकारणाऱ्या काझी याच्या विरोधात देवपूर पोलीस ठाण्यात गुन्हा दाखल करण्यात आला आहे.
तक्रारदार हे देवपूर पोलीस स्टेशनच्या हद्दीत ओमनी गाडीवर सोडा विक्री करण्याचा व्यवसाय करीत असून सदरचा व्यवसाय करू देण्यासाठी व कोणतेही कायदेशीर कारवाई न करण्यासाठी लाचखोर पोलीस हवालदार एजाझ काझी (वय- ५२ वर्ष, नियुक्ती देवपूर पोलीस स्टेशन) याने तक्रारदाराकडे चार हजार रुपयांची मागणी केली होती.
तक्रारदाराला पैसे देण्याची इच्छा नसल्याने त्याने नाशिकच्या एसीबीसी संपर्क करत तक्रार नोंदवली. त्यानंतर लगेचच मंगळवारी लाचखोर हवालदाराला पकडण्यासाठी पोलीस निरीक्षक अमोल वालझाडे यांच्या नेतृत्वाखाली पोलीस हवालदार प्रभाकर गवळी, पोलीस कॉन्स्टेबल सुरेश पवार आदींच्या पथकाने सापळा लावला. कार्यालयातच लाच घेताना हवालदार काझी याला रंगेहात पकडण्यात आले.
नासिक एसीबीचे अधिकारी या संदर्भात पुढील तपास करत आहेत.
