शनिवार, १९ ऑक्टोबर
संगमनेर – संगमनेरची बाजारपेठ हे जिल्ह्यातील सर्वात मोठी बाजारपेठ असून दिवाळी सणाच्या पार्श्वभूमीवर बाजारपेठेत मोठ्या प्रमाणात कोट्यावधी रुपयांची आर्थिक उलाढाल होत असते. त्यामुळे दिवाळी सणाच्या पार्श्वभूमीवर शहरात येणाऱ्या नागरिकांसाठी नगर परिषदेने मूलभूत सुविधा उपलब्ध करून देण्याची मागणी संगमनेर शहर काँग्रेसचे अध्यक्ष सोमेश्वर दिवटे यांच्या नेतृत्वाखाली मुख्याधिकारी तथा प्रशासक रामदास कोकरे यांच्याकडे करण्यात आली आहे.
खरेदीच्या निमित्ताने शहरात येणाऱ्या नागरिकांना पार्किंगची व्यवस्था व्हावी, घनकचऱ्याचे व्यवस्थापन व्हावे, शहरातील रस्त्यांवर पडलेले खड्डे बुजविण्यात यावे तसेच शहरातील सर्व स्ट्रीट लाईट सुरू असाव्यात आदी मागण्या निवेदनाद्वारे करण्यात आल्या आहे. दिवटे यांच्यासह माजी नगराध्यक्ष दिलीप पुंड व विश्वास मुर्तडक, माजी उपनगराध्यक्ष शैलेश कलंत्री, नूर मोहम्मद शेख, राजेंद्र वाकचौरे, गणेश मादास, अंबादास आडेप आदींसह पदाधिकारी उपस्थित होते.
शुक्रवारी देण्यात आलेल्या निवेदनात म्हटले आहे की, काँग्रेस विधिमंडळ पक्षनेते आमदार बाळासाहेब थोरात, माजी आमदार डॉ. सुधीर तांबे यांच्या नेतृत्वाखाली संगमनेर शहर हे वैभवशाली शहर म्हणून ओळखले जात आहे. तालुक्याची आर्थिक व्यवस्था मजबूत असल्याने दिवाळीच्या काळात शहरांमध्ये शेकडो कोटींची उलाढाल होत असते. याचबरोबर संगमनेर तालुक्यासह आसपासच्या तालुक्यातील अनेक नागरिक खरेदीसाठी मोठ्या संख्येने संगमनेर शहरात येतात.
त्यामुळे या सर्व नागरिकांना चांगल्या सुविधा मिळाव्यात. सणासुदीच्या काळातील स्वच्छतेकरता घनकचरा व्यवस्थापन व्हावे, सर्व रस्त्यांवरील स्ट्रीट लाईट सुरु कराव्यात, विविध रस्त्यांवर असलेले खड्डे तात्काळ बुजवावेत, तसेच आलेल्या सर्व नागरिकांना पार्किंगची चांगली सुविधा व्हावी आदी नागरी समस्यांची सोडवणूक करण्याची मागणी करण्यात आली आहे.
मुख्याधिकारी तथा प्रशासक रामदास कोकरे यांनी शहर काँग्रेसचे निवेदन स्वीकारले. यावेळी प्रास्ताविक शहराध्यक्ष सोमेश्वर दिवटे यांनी केले. पदाधिकारी, कार्यकर्त्यांसह शहरातील नागरिक यावेळी उपस्थित होते.
