महाराष्ट्र संवाद न्यूज ऑनलाईन-
संगमनेर तालुक्यातील खंडेरायवाडी-साकूर दरा परिसरातील खोल दरीत ४५ वर्षीय विवाहित महिलेचा खून केलेल्या अवस्थेत मृतदेह आढळून आल्याने परिसरात खळबळ उडाली आहे. मनिषा रामनाथ चाचण असे मृत महिलेचे नाव असून, ती बेपत्ता असल्याची नोंद घारगाव पोलिस ठाण्यात यापूर्वीच करण्यात आली होती. गुरुवारी सकाळी ही धक्कादायक घटना उघडकीस आली.
मनिषा चाचण आपल्या कुटुंबीयांसह खंडेरायवाडी-साकूर दरा येथे वास्तव्यास होती. गुरुवारी सकाळी काही तरुण या परिसरात गेले असता त्यांना रक्ताचे डाग निदर्शनास आले. त्यानंतर ग्रामस्थांनी तातडीने घटनास्थळी धाव घेत याची माहिती घारगाव पोलिसांना दिली.
घटनेची माहिती मिळताच पोलिस निरीक्षक संदीप वऱ्हाडे आणि पोलिस उपअधीक्षक डॉ. कुणाल सोनवणे यांनी घटनास्थळी भेट देऊन पाहणी केली. स्थानिकांच्या मदतीने मृतदेह खोल दरीतून बाहेर काढण्यात आला. घटनेचे वृत्त समजताच सुमारे शंभर ते दोनशे ग्रामस्थ घटनास्थळी जमा झाले होते.
महिलेचा खून करून पुरावा नष्ट करण्याच्या उद्देशाने मृतदेह खोल दरीत फेकून दिल्याचा प्राथमिक अंदाज पोलिसांनी वर्तवला आहे. तपासासाठी फॉरेन्सिक पथक आणि श्वान पथकाला पाचारण करण्यात आले होते. या प्रकरणी पोलिसांनी एका संशयिताला ताब्यात घेतले असून, त्याची सखोल चौकशी सुरू आहे.