महाराष्ट्र संवाद न्यूज ऑनलाईन- गुन्ह्याच्या तपासात आरोपींना मदत करण्याच्या मोबदल्यात ५० हजार रुपयांची लाच स्वीकारणाऱ्या परिविक्षाधीन पोलीस उपनिरीक्षकाला लाचलुचपत प्रतिबंधक विभागाच्या (एसीबी) मुंबई पथकाने सापळा रचून ताब्यात घेतले आहे. या कारवाईदरम्यान लाचेची रक्कम स्वीकारल्यानंतर सापळ्याचा संशय आल्याने एक पोलीस शिपाई रकमेसह पसार झाला असून त्याचा शोध सुरू आहे.
हरेश्वर यशवंत शेंडे (वय २६, परिविक्षाधीन पोलीस उपनिरीक्षक, व्ही. पी. मार्ग पोलीस ठाणे, मुंबई) असे ताब्यात घेतलेल्या अधिकाऱ्याचे नाव आहे, तर धनंजय दिलीप वायसे (व्ही. पी. मार्ग पोलीस ठाणे, मुंबई) हा पसार झालेल्या आरोपी पोलीस शिपायाचे नाव आहे.
व्ही. पी. मार्ग पोलीस ठाण्यात दाखल असलेल्या एका गुन्ह्याचा तपास हरेश्वर शेंडे यांच्याकडे होता. या गुन्ह्यात तक्रारदार व त्यांच्या आईविरोधात गुन्हा नोंद होता. तपासात आरोपींना मदत करण्यासाठी शेंडे यांनी तक्रारदाराकडे प्रत्येकी २५ हजार रुपये याप्रमाणे एकूण ५० हजार रुपयांची लाच मागितली होती. मात्र, तक्रारदाराला लाच देण्याची इच्छा नसल्याने त्यांनी १६ नोव्हेंबर २०२६ रोजी लाचलुचपत प्रतिबंधक विभागाच्या मुंबई कार्यालयात तक्रार दाखल केली.
या तक्रारीच्या अनुषंगाने १६ आणि १८ नोव्हेंबर २०२६ रोजी पडताळणी करण्यात आली. त्यामध्ये हरेश्वर शेंडे यांनी तक्रारदाराकडे ५० हजार रुपयांची लाच मागून ती स्वीकारण्याचे मान्य केल्याचे निष्पन्न झाले. त्यानंतर १८ नोव्हेंबर २०२६ रोजी रचलेल्या सापळ्यादरम्यान शेंडे यांनी ही रक्कम पोलीस शिपाई धनंजय वायसे याच्याकडे देण्यास सांगितले. वायसे याने तक्रारदाराकडून ५० हजार रुपयांची लाच स्वीकारली, परंतु लाचलुचपतच्या सापळ्याचा संशय आल्यानंतर तो लाचेच्या रकमेसह घटनास्थळावरून पळून गेला.
लाचलुचपत प्रतिबंधक विभागाच्या मुंबई विभागात गुन्हा क्रमांक ३६/२०२६ अन्वये भ्रष्टाचार प्रतिबंध अधिनियम १९८८ मधील कलम ७, १२ आणि भारतीय न्याय संहितेच्या कलम २३८ नुसार गुन्हा दाखल करण्यात आला आहे. त्याच दिवशी सायंकाळी ७ वाजून ४५ मिनिटांनी आरोपी हरेश्वर शेंडे याला अटक करण्यात आली. ही कारवाई पोलीस निरीक्षक जगदिश मोरे यांच्या नेतृत्वाखालील सापळा पथकाने केली.