शनिवार, १९ ऑक्टोबर
विधानसभा निवडणुकीसाठी आचारसंहिता लागू झाली असून या आचारसंहितेचे कठोरपणे पालन केले जात असल्याचे भासविले जात असल्याचे समोर आले आहे. संगमनेर बस स्थानकाच्या गाळ्यात शिर्डी लोकसभा मतदार संघाच्या विद्यमान खासदारांचे संपर्क कार्यालय असून या संपर्क कार्यालयाचा नामफलक मात्र आचारसंहितेतून वगळला गेला की काय असा प्रश्न उपस्थित झाला आहे.
राज्यात विधानसभा निवडणुकीसाठी १५ ऑक्टोबरला आदर्श आचारसंहिता लागू झाली आहे. राज्यासह संगमनेर मतदार संघात २० नोव्हेंबरला मतदान होत आहे. राजकीय पक्षांचे फलक आचारसंहिता लागू होतात तातडीने काढण्यात आले असले तरी शिर्डी लोकसभा मतदारसंघाचे विद्यमान खासदार भाऊसाहेब वाकचौरे यांच्या संपर्क कार्यालयाचा नामफलक मात्र अद्यापही दर्शनी भागावर आहे त्या स्थितीत आहे.
हा नामफलक अर्धवट झाकण्याचा प्रयत्न केल्याचे दिसते. विशेष म्हणजे याच चौकातून निवडणूक निर्णय अधिकारी, सहाय्यक निवडणूक निर्णय अधिकारी यांच्यासह प्रशासनातील अनेक अधिकाऱ्यांची ये-जा असते. बस स्थानकाच्या गाळ्यात असलेला आणि लक्ष वेधून घेणार हा फलक अद्याप कोणत्याही अधिकाऱ्याच्या निदर्शनास आल्याचे दिसत नाही.
शनिवारी संध्याकाळी वृत्त प्रसिद्ध होईपर्यंत हा नाम फलक छायाचित्रात असलेल्या स्थितीत कायम होता. त्यामुळे आदर्श आचारसंहितेचे कठोरपणे मतदारसंघात पालन केले जात असल्याचे भासविले जात आहे का असा देखील प्रश्न या निमित्ताने उपस्थित झाला.
शहरातील राजकीय पक्षांचे फ्लेक्स बोर्ड, बॅनर पाठविण्यात आले असले तरी संपर्क कार्यालयावरील फलक मात्र अद्यापही उघडाच असल्याने या मतदारसंघात विशेषतः सातत्याने गजबजलेल्या बस स्थानक चौकात किती गांभीर्याने पालन होते हे देखील या निमित्ताने स्पष्ट झाले आहे.
