मंगळवार, २२ ऑक्टोबर
मुंबई – भारतीय जनता पक्षाने आपली ९९ उमेदवारांची यादी जाहीर केल्यानंतर उपमुख्यमंत्री अजित पवार यांनी देखील उमेदवारी जाहीर करण्यापूर्वीच आपल्या राष्ट्रवादी काँग्रेसच्या उमेदवारांना एबी फॉर्म चे वाटप केले आहे. अहिल्या नगर जिल्ह्यातून अकोले मतदार संघात विद्यमान आमदार डॉ. किरण लहामटे यांना एबी फॉर्म दिल्याने ते महायुतीचे या मतदारसंघातील उमेदवार असतील.
अकोले मतदार संघाची जागा डॉ. किरण लहामटे यांच्या रूपाने राष्ट्रवादी काँग्रेस अजित पवार पक्षाकडे राहिली आहे. लहामटे यांना एबी फॉर्म मिळाल्याने महायुतीच्या जागा वाटपात ही जागा अजित पवार गटाकडे गेल्याचे स्पष्ट झाले आहे. समोर महाविकास आघाडीचा उमेदवार कोण असेल हे अद्याप स्पष्ट झालेले नाही. तसेच गेल्या वेळी भारतीय जनता पक्षाकडून निवडणूक लढविणारे वैभव पिचड हे देखील उमेदवारीसाठी इच्छुक असल्याने ते आणि अन्य इच्छुक काय निर्णय घेतात यावर पुढील गणिते अवलंबून आहे.
अजित पवार गटाकडे ही जागा गेल्याने डॉ. किरण लहामटे यांच्यासमोर आता महाविकास आघाडी कडून राष्ट्रवादी काँग्रेस शरदचंद्र पवार पक्षाचा उमेदवार असण्याची दाट चिन्ह निर्माण झाली आहे. शरद पवार यांच्या राष्ट्रवादी काँग्रेस कडून निवडणूक लढविण्यास मतदार संघातील अनेक इच्छुक मैदानात उतरले असून त्या दृष्टीने तिकीट मिळवण्यासाठी त्यांनी पवारांची गाठभेट देखील घेतल्याचे वृत्त आहे.
महाविकास आघाडीचा उमेदवार ठरविताना आमदार बाळासाहेब थोरात यांची भूमिका ठरणार निर्णायक…
या मतदारसंघात संगमनेर तालुक्यातील पठार भागातील बहुतांश गावाचा समावेश असल्याने महाविकास आघाडीचा उमेदवार ठरविण्यात काँग्रेस नेते माजी मंत्री बाळासाहेब थोरात यांचा देखील सहभाग राहण्याची चिन्हे आहेत. थोरात यांच्या शब्दावर या भागातील मतदान फिरत असल्याने थोरात यांना देखील उमेदवारी देताना विश्वासात घेतले जाईल, असे राजकीय वर्तुळातील बातमी आहे.
