मंगळवार, २२ ऑक्टोंबर
संगमनेर विधानसभा मतदारसंघातून निवडणूक लढविण्यासाठी अकरा इच्छुकांनी पहिल्याच दिवशी पंचवीस उमेदवारी अर्ज नेले असल्याची माहिती निवडणूक निर्णय अधिकारी शैलेंद्र हिंगे यांनी दिली. 
त्यामुळे विधानसभा निवडणुकीसाठीची रंगत आता खऱ्या अर्थाने सुरू झाली आहे. संगमनेर विधानसभा मतदारसंघाचे नेतृत्व गेल्या चार दशकांपासून माजी मंत्री आमदार बाळासाहेब थोरात करत आहेत. दरवेळी त्यांच्या विरोधात वेगवेगळ्या उमेदवार विरोधी पक्षांकडून देण्यात आला. यावेळी देखील विरोधी पक्षाकडून कोणाला संधी मिळते याची उत्सुकता आहे.
विधानसभा निवडणुकीसाठी या मतदारसंघातून अहिल्यानगरचे माजी खासदार सुजय विखे यांनी तेथील पराभव जिव्हारी लागल्याने या मतदारसंघात थोरात यांच्या विरोधात जोरदार प्रचार मोहीम राबविली असली तरी ते उमेदवार असतीलच याबाबत मात्र साशंकता आहे. शिवाय ही जागा शिवसेना शिंदे गटाकडे असल्याने हे भारतीय जनता पक्षाला मिळेल का याबाबत देखील द्विधा स्थिती आहे.
थोरात यांच्या विरोधात निवडणूक लढविण्यास अनेक जण इच्छुक असले तरी त्यांना लढत देऊ शकेल असा उमेदवार अद्याप तरी विरोधी पक्षांकडे दिसत नाही. त्यामुळे महायुतीच्या जागा वाटपात ही जागा कोणाला जाते आणि शेवटच्या क्षणी कोणाला संधी मिळते, यावर या मतदारसंघाची गणित अवलंबून असतील.
मंगळवारी उमेदवारी अर्ज दाखल करण्याचा पहिला दिवस होता. मात्र या मतदारसंघात ११ इच्छुकांनी २५ उमेदवारी अर्ज नेले असून एकाही उमेदवाराचा अर्ज पहिल्या दिवशी दाखल झाला नाही. संगमनेर मतदार संघातून यावेळी किती उमेदवार निवडणूक रिंगणात उतरतात याची देखील उत्सुकता आहे.
मंगळवारी उमेदवारी अर्ज नेणाऱ्या इच्छुकांची नावे पुढीलप्रमाणे (कंसात उमेदवारी अर्ज)
भागवत धोंडीबा गायकवाड (४), शिवाजी दत्तू आरगडे (२), अविनाश हौशीराम भोर (जय हिंद नवभारत रहीम पार्टी) (१), सूर्यभान बाबुराव गोरे (बहुजन समाज पार्टी) (०२), संदीप भाऊ मोकळ (वंचित बहुजन आघाडी) (०४), कांदळकर गोविंद गमाजी (१), बाळासाहेब मारुती नवले (१), अल्ताफ इब्राहिम शेख (१), शशिकांत विनायक दारोळे (रिपब्लिकन पार्टी ऑफ इंडिया) (२), ऋषिकेश चंद्रकांत आरोटे (४) व अजय गणपत भडांगे (२)
