शुक्रवार, २६ ऑक्टोबर
संगमनेर विधानसभा मतदारसंघात शुक्रवारी आणखी पाच इच्छुक उमेदवारांनी १० उमेदवारी अर्ज नेले आहे. त्यामुळे आत्तापर्यंत ३१ इच्छुकांनी ६३ उमेदवारी अर्ज नेले असून मंगळवारी उमेदवारी अर्ज दाखल करण्याचा अखेरचा दिवस आहे.
शनिवार, रविवारची सुट्टी वगळता शेवटच्या दोन दिवसात प्रमुख उमेदवारांचे अर्ज नेले जाणार असून लगेचच त्यांचे उमेदवारी अर्ज दाखल होण्याची चिन्हे आहेत. महाविकास आघाडीकडून काँग्रेसचे बाळासाहेब थोरात यांना उमेदवारी जाहीर झाली असून अद्याप त्यांनी देखील उमेदवारी अर्ज नेलेला नाही. तर महायुतीकडून कोणाला उमेदवारी मिळते याची उत्सुकता आहे. दरम्यान वंचित बहुजन आघाडी कडून उमेदवारी मिळालेल्या अजिज व्होरा यांनी देखील अद्याप उमेदवारी अर्ज दाखल केला नाही. व्होरा आज उमेदवारी अर्ज दाखल करण्याची शक्यता होती.
दरम्यान शुक्रवारी अमोल धोंडीबा खताळ पाटील यांनी भारतीय जनता पार्टीसाठी २ आणि २ अपक्ष असे चार उमेदवारी अर्ज नेले. याशिवाय योगेश मनोहर सूर्यवंशी (महाराष्ट्र नवनिर्माण सेना) यांनी तीन उमेदवारी अर्ज नेले आहेत. लोकशाही पार्टीसाठी प्रदीप विठ्ठल घुले व रिपब्लिकन पार्टी ऑफ इंडियासाठी प्रकाशराव रामचंद्र वाघमारे यांनी उमेदवारी अर्ज घेतले असल्याची माहिती निवडणूक निर्णय अधिकारी शैलेंद्र हिंगे यांनी दिली आहे.
आत्तापर्यंत केवळ एका उमेदवाराचा अर्ज दाखल झाला असून मोठ्या संख्येने इच्छुकांनी उमेदवारी अर्ज नेले असले तरी प्रत्यक्षात यातील किती जण उमेदवारी अर्ज भरतात आणि त्यापैकी मैदानात किती जण लढतात याचीदेखील संगमनेरकरांना उत्सुकता आहे.
महाविकास आघाडीकडून नवव्यांदा काँग्रेसचे ज्येष्ठ नेते माजी मंत्री आमदार बाळासाहेब थोरात यांची उमेदवारी जाहीर झाली असून अद्याप महायुतीकडून त्यांचा प्रतिस्पर्धी समोर आलेला नाही.
