मंगळवार, २९ ऑक्टोबर
संगमनेर – सध्याचे महसूल मंत्री राधाकृष्ण विखे यांनी मला भाजपमध्ये येण्याची ऑफर दिली होती. ती मी स्वीकारली नाही. शिंदे गटाची जिल्हाप्रमुख होण्याची ऑफर दिली होती परंतु मी उद्धव बाळासाहेब ठाकरे यांचा प्रामाणिक सैनिक असल्याने मी या ऑफर नाकारल्याने विखे यांनी रागातून माझ्यावर सूड भावनेतून कारवाई केली असल्याची टीका शिवसेनेचे माजी शहर प्रमुख अमर कतारी यांनी केली आहे.
अमर कतारी यांनी दिलेल्या प्रसिद्धी पत्रकात म्हटले आहे की, सध्याचे महसूल मंत्री राधाकृष्ण विखे यांनी मला भाजपमध्ये येण्याची ऑफर दिली होती. परंतु मी एकनिष्ठ शिवसैनिक असलेले ती ऑफर नाकारली. काही दिवस गेल्यानंतर लोकसभेच्या काळामध्ये मला शिंदे गटाचे जिल्हाप्रमुख होण्याची ऑफर दिली. 
मी तीही नाकारली याचा राग त्यांना होता त्यातून त्यांनी माझी रोजी रोटी असलेले आणि जिल्ह्यात आदर्श असलेले शिव भोजन केंद्र एका दिवसात बंद केले. माझे बस थांबाचे एक वर्षाचे कॉन्ट्रॅक्ट असताना ते एका दिवसात बंद केले. मी गद्दारी केली नाही त्यामुळे त्यांनी माझ्याशी राग धरला.
आज महाविकास आघाडीचे नेते आमदार बाळासाहेब थोरात यांचा उमेदवारी अर्ज दाखल करून मी घरी परतलो. त्यानंतर एक वाजता सभेसाठी जात असताना भाजपचे शहर प्रमुख गणपुले यांनी थांबून मला विचारले की काल तू भाजप विरोधी पोस्ट का टाकली. तर मी त्यांना सांगितले, लोकशाही आहे मत मांडण्याचा प्रत्येकाला अधिकार आहे. यावरून त्यांना खूप राग आला. आणि त्यांनी कमरेवरून बंदूक काढण्याचा प्रयत्न केला. तरी मी त्यांना शांततेत समजावण्याचा प्रयत्न केला. मी माझ्या गाडीजवळ गेलो असताना त्यांनी पुन्हा गाडीची चावी काढून माझ्यावर अरेरावी केली आणि वरून मला दमबाजी केली की, आम्हाला वरिष्ठांचा आदेश आहे. 
कोणीही भाजप विरोधी बोलले तर त्याला गाढून टाका.याला सर्व पोलीस साक्षीदार आहे. सर्व जनता साक्षीदार आहे. परंतु मी घरी आल्यानंतर माझ्यावर खोटे गुन्हे दाखल केले ही फक्त सूड भावनेतून केलेली कारवाई असल्याचेही त्यांनी म्हटले आहे.
