मंगळवार, २९ ऑक्टोबर
संगमनेर विधानसभा मतदारसंघात उमेदवारी अर्ज दाखल करण्याच्या अखेरच्या दिवसाखेर १६ उमेदवारांनी २४ अर्ज दाखल केले असल्याची माहिती निवडणूक निर्णय अधिकारी शैलेंद्र हिंगे यांनी दिली.
उमेदवारी अर्ज दाखल करणाऱ्या प्रमुख उमेदवारांमध्ये महाविकास आघाडी कडून विद्यमान आमदार बाळासाहेब थोरात, महायुतीकडून अमोल खताळ, वंचित बहुजन आघाडीचे अजीज व्होरा, महाराष्ट्र नवनिर्माण सेनेचे योगेश सूर्यवंशी या प्रमुख उमेदवारांचा समावेश आहे.
महायुतीकडून संगमनेरची जागा मुख्यमंत्री शिंदे यांच्या शिवसेनेला सोडण्यात आली असून या जागेवर पालकमंत्री राधाकृष्ण विखे पाटील यांचे समर्थक अमोल खताळ यांना उमेदवारी देण्यात आली. त्यामुळे नाराज झालेल्या शिवसेनेच्या विठ्ठल घोरपडे यांनी बंडखोरी केली आहे.
नगर दक्षिणचे माजी खासदार सुजय विखे पाटील यांच्या उमेदवारीच्या घोषणेने राज्यभरात हाय व्होल्टेज ठरलेल्या या निवडणुकीत ऐनवेळी त्यांनी माघार घेतली. विखे पाटील खरंच निवडणूक लढविणार का याविषयी गेल्या अनेक दिवसांपासून संगमनेरमध्ये तर्कवितर्क सुरू होते. राजकीय विश्लेषकांच्या मते सुजय विखे निवडणूक लढविणार नाही हा अंदाज वर्तवला जात होता, तो अखेर खरा ठरला आहे.
मोठ्या हौसेने उमेदवारी अर्ज दाखल केल्यानंतर तो माघारीपर्यंत काढून घेत निवडणुकीचे मैदान सोडणाऱ्या रणछोडदासांकडे आता लक्ष लागले आहे. १६ पैकी किती उमेदवार निवडणुकीतून माघार घेतात हे देखील लवकरच स्पष्ट होणार आहे.
संगमनेर विधानसभा मतदारसंघातून दाखल झालेले अर्ज पुढील प्रमाणे…
- भागवत धोंडीबा गायकवाड (ऑल इंडिया फॉरवर्ड ब्लॉक)
- अब्दुल अजीज अहमद शरीफ व्होरा (वंचित बहुजन आघाडी)
- अजय गणपत भडांगे (अपक्ष)
- सूर्यभान बाबुराव गोरे (बहुजन समाज पक्ष)
- विजय उर्फ बाळासाहेब भाऊसाहेब थोरात (इंडियन नॅशनल काँग्रेस)
- शशिकांत विनायक दारोळे (रिपब्लिकन पार्टी ऑफ इंडिया (ए))
- भारत संभाजी भोसले (समता पार्टी)
- विठ्ठल रावसाहेब घोरपडे (अपक्ष)
- दत्तात्रेय रावसाहेब ढगे (अपक्ष)
- अल्ताफ इब्राहिम शेख (अपक्ष)
- अविनाश हौशीराम भोर (जयहिंद जयभारत राष्ट्रीय पार्टी)
- कलीराम भैरू पोपळघट (भारतीय नवजवान सेना)
- रभाजी गिरजी खेमनर (राष्ट्रीय समाज पक्ष)
- अमोल धोंडीबा खताळ (शिवसेना)
- प्रदीप विठ्ठल घुले (लोकशाही पार्टी)
- योगेश मनोहर सूर्यवंशी (महाराष्ट्र नवनिर्माण सेना)
