रविवार, ०३ नोव्हेंबर
विधानसभा निवडणुकीसाठी राज्यभरात उमेदवारी अर्ज मागे घेण्याचा उद्याचा (०४ नोव्हेंबर) अखेरचा दिवस आहे. सत्ताधारी महायुती आणि विरोधी महाविकास आघाडी आपापल्या पक्षातील बंडोबांना शांत करण्यासाठी एकवटले असतानाच आता मराठा आरक्षणासाठी लढा देणाऱ्या मनोज जरांगे यांनी महायुती आणि महाविकास आघाडीसाठी डोकेदुखी वाढविणारा निर्णय घेतला आहे. जरांगे यांचे राज्यभरात उमेदवार नसल्याने काहीसा सुटकेचा निश्वास या महायुती आणि महाविकास आघाडीने सोडला आहे.
जरांगे पाटील यांनी या विधानसभा निवडणुकीत कुणाला पाडणार आणि कुणाविरोधात लढणार या मतदारसंघाची थेट नावं जाहीर केली आहे. पाटील यांनी दिलेल्या यादीत काही ठिकाणी महायुतीचे तर काही ठिकाणी महाविकास आघाडीचे उमेदवार असल्यानं दोन्ही आघाड्यांची धाकधूक वाढली आहे.
राज्यात विधानसभा निवडणुकीची रणधुमाळी सुरू झाली आहे. उद्या अर्ज माघारी घेण्याची शेवटची तारीख आहे. तर २० तारखेला मतदान होणार आहे. आणि २३ तारखेला निकाल लागणार आहे. 
एकीकडे बंडखोरांनी महायुती व महाविकास आघाडीची डोकेदुखी वाढवली असतांना आता मराठा आरक्षणासाठी लढा उभारणारे मनोज जरांगे पाटील यांनी देखील मोठा निर्णय जाहीर केला आहे. जरांगे यांनी जाहीर केलेल्या मतदार संघात आता महायुती आणि महाविकास आघाडीच्या उमेदवारांना मनोज जरांगे यांच्या उमेदवारांचा सामना करावा लागणार आहे.
मनोज जरांगे पाटील यांनी मराठा आरक्षणासाठी सरकारला अल्टीमेटम दिला होता. मात्र, सरकारने त्यांच्या मागण्या मान्य केल्या नाही. त्यामुळे त्यांनी सत्ताधारी आणि विरोधकांच्या विरोधात आपले उमेदवार उभे करण्याचं जाहीर केलं होतं. 
त्यानुसार त्यांनी राज्यातील अनेक मतदार संघातून त्यांचे उमेदवार उभे केले आहे. उद्या उमेदवारी अर्ज माघारी घेण्याचा शेवटचा दिवस आहे. त्यामुळे कोणत्या ठिकाणचे उमेदवार पडणार याची यादीच जरांगे पाटील यांनी जाहीर केली आहे. या यादीत मराठवाड्यातील मतदार संघांचा समावेश आहे. या मतदार संघात महायुती आणि महाविकास आघाडीचे उमेदवार उभे असल्याने जरांगे यांच्या निर्णयामुळे दोघांचं टेन्शन वाढलं आहे.
या मतदार संघातील उमेदवार जरांगे पाटील पाडणार…
गंगापूर विधानसभा मतदारसंघ, कन्नड विधानसभा मतदारसंघ, हिंगोली मधील कळमनुरी विधानसभा मतदार संघ, परभणी मधील गंगाखेड, भोकरदन, जिंतूर आणि औसा विधानसभा मतदारसंघातील उमेदवार पाडणार असल्याचे जरांगे यांनी म्हटले आहे. तर या मतदारसंघात असतील जरांगे यांचे उमेदवार… बीड जिल्ह्यातील केज विधानसभा मतदारसंघ, जालना जिल्ह्यातील मंठा परतूर विधानसभा मतदारसंघ, बीड शहर विधानसभा मतदारसंघ, छत्रपती संभाजीनगरमधील फुलंब्री, हिंगोली, पाथरी व हदगाव विधानसभा मतदार संघात उमेदवार दिले आहे. तर छत्रपती संभाजी नगर पश्चिम, बदनापूरमधून जरांगे दुसऱ्या उमेदवाराला पाठिंबा देणार असल्याचे त्यांनी जाहीर केले आहे.
