सोमवार, ०४ नोव्हेंबर
नाशिक – राज्याचे माजी समाज कल्याण मंत्री बबनराव घोलप यांनी देवळाली विधानसभा मतदारसंघातून मुलगी तनुजा उर्फ दिपाली हिने अपक्ष उमेदवारी करताना माहेरचे आडनाव वापरू नये यासाठी नोटीस बजावली आहे. भाऊबीजेच्या दिवशीच घोलप कुटुंबातील वाद चव्हाट्यावर आला आहे. घोलप यांनी मुलीला बजावलेल्या नोटीसचे राज्याच्या राजकीय वर्तुळात चर्चा रंगली आहे. 
देवळाली विधानसभा मतदारसंघात शिवसेना (उद्धव बाळासाहेब ठाकरे) पक्षाकडून योगेश घोलप यांना उमेदवारी देण्यात आली आहे. तर माजी मंत्री बबनराव घोलप यांनी मुख्यमंत्री एकनाथ शिंदे यांच्या शिवसेनेच्या उपनेतेपदाचा राजीनामा देत पुन्हा ठाकरे यांच्या पक्षात प्रवेश केला आहे. घोलप मुलगा योगेश यांच्या प्रचारासाठी सरसावले आहे. 
तर घोलप यांच्या कन्या तनुजा उर्फ दिपाली भोईर या भाजपच्या पदाधिकारी असून त्या विधानसभा निवडणूक लढविण्यासाठी इच्छुक आहेत. त्यांनी देवळाली विधानसभा मतदारसंघातून अपक्ष उमेदवारी अर्ज दाखल केला आहे. 
आज सोमवारी उमेदवारी अर्ज मागे घेण्याचा अखेरचा दिवस असून त्या उमेदवारी अर्ज मागे घेतात की भावाविरुद्ध लढतात हे स्पष्ट होईल. 
दरम्यान माजी मंत्री घोलप यांनी गेल्या आठवड्यात तनुजा घोलप यांनी माझ्या नावाचा कुठलाही वापर करू नये, असा इशारा दिला होता. तनुजा यांचा विवाह झालेला असून त्यांचे पतीकडील नाव भोईर आहे. मात्र गेल्या काही दिवसांपासून तनुजा या बाहेर कडील आडनावाचा वापर करत आहे. त्यामुळे घोलप यांनी लेकीला माहेरकडील घोलप आडनाव न वापरण्याचा सल्ला दिला होता. तसेच नाव वापरू नये यासाठी कायदेशीर नोटीस देखील देण्याचा इशारा दिला होता. 
आता मात्र घोलप यांनी कायदेशीर नोटीस बजावल्याने भाऊबीजेच्या दिवशीच घोलप कुटुंबातील वाद समोर आला असून तनुजा उर्फ दिपाली यांना काढलेल्या नोटीस मध्ये आपला विवाह झालेला असल्याने आपण माहेरचे नाव न लावता सासरकडील नाव लावावे असे म्हटले आहे. घोलप यांनी बजावलेल्या या नोटीसमुळे राजकीय वर्तुळात चर्चा रंगली आहे.
