सोमवार, ०४ नोव्हेंबर
उमेदवारी अर्ज मागे घेण्याच्या अखेरच्या दिवशी संगमनेर विधानसभा मतदारसंघातून शिवसेनेच्या बंडखोरासह रासपच्या उमेदवारांनी निवडणुकीतून माघार घेतली आहे. दोघांनी निवडणुकीचे मैदान सोडल्याने आता निवडणुकीत १३ उमेदवार उरले आहे.
शिवसेनेचे बंडखोर उमेदवार विठ्ठल घोरपडे आणि रासपचे उमेदवार रभाजी खेमनर अशी माघार घेतलेल्या दोघा उमेदवारांची नाव आहे. संगमनेर विधानसभा मतदारसंघ बंडखोरी रोखण्यात महायुतीला यश आले आहे. या मतदारसंघात महसूल मंत्री राधाकृष्ण विखे समर्थक अमोल खताळ यांना शिवसेनेकडून उमेदवारी देण्यात आली आहे. शिवसेनेच्या धनुष्यबाण चिन्हावर भाजपाचे खताळ सलग आठ टर्म आमदार राहिलेल्या माजी मंत्री बाळासाहेब थोरात यांना लढत देणार आहे. 
याशिवाय मनसे आणि वंचितचे उमेदवारही निवडणुकीच्या मैदानात आहे. या दोन्ही उमेदवारांच्या मतांचा फटका कोणाला बसतो हे निवडणुकीनंतर स्पष्ट होईल. वंचित बहुजन आघाडीकडून अजीज व्होरा या कार्यकर्त्याला संधी देण्यात आली आहे. तर मनसेकडून योगेश सूर्यवंशी आपले नशीब आजमावत आहे.
संगमनेर विधानसभा मतदारसंघातील लढतीचे चित्र सोमवारी स्पष्ट झाल्यानंतर आता प्रत्यक्षात प्रचाराला उमेदवारांकडून सुरुवात होणार असून या मतदारसंघात कोणत्या पक्षांच्या प्रमुख नेत्यांच्या सभा उमेदवारासाठी आयोजित केल्या जातात याकडदेखील मतदारांचे लक्ष लागले आहेत.
निवडणुकीच्या रिंगणात १३ उमेदवार असले तरी प्रमुख लढत ही महाविकास आघाडीचे बाळासाहेब थोरात, महायुतीचे अमोल खताळ, वंचितचे अजीज व्होरा, मनसेचे योगेश सूर्यवंशी यांच्यात होईल. सलग चार दशके या मतदारसंघाचे नेतृत्व करणाऱ्या थोरात यांच्या विरोधात उर्वरित प्रमुख तीन उमेदवारांच्या पारड्यात संगमनेरकर मतदार किती मते टाकतात याची उत्सुकता आहे. 
माघारीनंतर निवडणूक मैदानात शिल्लक राहिलेले उमेदवार पुढीलप्रमाणे…
अमोल धोंडीबा खताळ (शिवसेना)
थोरात विजय उर्फ बाळासाहेब भाऊसाहेब (काँग्रेस)
योगेश मनोहर सूर्यवंशी (महाराष्ट्र नवनिर्माण सेना)
सूर्यभान बाबुराव गोरे (बहुजन समाज पार्टी)
अब्दुलअजीज अहमदशरीफ व्होरा (वंचित बहुजन आघाडी)
अविनाश हौशीराम भोर (जय हिंद जय भारत राष्ट्रीय पार्टी)
कलीराम बहिरू पोपळघट (भारतीय नवजवान सेना पक्ष)
गायकवाड भागवत धोंडीबा (ऑल इंडिया फॉरवर्ड ब्लॉक)
प्रदीप विठ्ठल घुले (लोकशाही पार्टी)
भारत संभाजी भोसले (समता पार्टी)
शशिकांत विनायक दारोळे (रिपब्लिकन पार्टी ऑफ इंडिया ए)
अजय गणपत भडांगे (अपक्ष)
दत्तात्रेय रावसाहेब ढगे (अपक्ष)
फोटो, पक्ष आणि चिन्हासह उमेदवारांची यादी….
