सोमवार, ०४ नोव्हेंबर
देवळाली – माजी समाज कल्याण मंत्री बबनराव घोलप यांनी देवळाली विधानसभा मतदार संघातून भावाविरुद्ध उमेदवारी अर्ज दाखल करणाऱ्या मुलीला कायदेशीर नोटीस पाठविल्यानंतर सोमवारी या मतदारसंघातील अपक्ष उमेदवार तनुजा घोलप यांनी माघार घेतली आहे. माघार घेतली असली तरी या मतदारसंघातील महाविकास आघाडीचे उमेदवार योगेश घोलप यांना भाऊ म्हणून शुभेच्छा देत प्रचार मात्र भावाऐवजी महायुतीच्या उमेदवाराचा करणार असल्याचे घोलप यांनी म्हटले आहे.
देवळाली विधानसभा मतदारसंघातून शिवसेना (उद्धव बाळासाहेब ठाकरे) पक्षाने माजी समाज कल्याण मंत्री आणि मुख्यमंत्री एकनाथ शिंदे यांच्या शिवसेनेचे उपनेते बबनराव घोलप यांच्या मुलाला म्हणजेच योगेश घोलप यांना महाविकास आघाडीचे उमेदवारी दिल्यानंतर बबनराव घोलप स्वतः पुन्हा स्वगृही ठाकरेंच्या पक्षात सामील झाले आहे.
असे असले तरी भाजपच्या नेत्या असलेल्या तनुजा घोलप-भोईर यांनी चक्क आपल्या भावा विरोधात अपक्ष उमेदवारी अर्ज दाखल केला होता. त्यामुळे घोलप यांनी तनुजा घोलप यांना माहेरकडील नाव लावू नये यासाठी नोटीस बजावली होती. दरम्यान तनुजा घोलप यांनी उमेदवारी अर्ज मागे घेण्याच्या अखेरच्या दिवशी सोमवारी आपला उमेदवारी अर्ज मागे घेतला आहे. तनुजा यांनी अपक्ष उमेदवारी अर्ज दाखल केल्याने त्यांना कौटुंबिक कलहाचा सामना करावा लागला. त्यामुळे उमेदवारी अर्ज मागे घेताना तनुजा घोलप यांना अश्रू अनावर झाल्याचे देखील बघावयास मिळाले.
वडिलांनी मुलीला बजावलेल्या कायदेशीर नोटीस मुळे निर्माण झालेला कौटुंबिक कलह माघारी नंतर शमला असला तरी तनुजा घोलप यांनी आपण महायुती सोबतच असल्याचे स्पष्ट केले आहे. तसेच या मतदारसंघात महायुतीच्या उमेदवार सरोज अहिरे यांचा प्रचार करणार असल्याचे त्या म्हणाल्या.
