सोमवार, ०४ नोव्हेंबर
संगमनेर, अकोले या दोन विधानसभा मतदारसंघांसाठी निवडणूक आयोगाकडून नियुक्त करण्यात आलेल्या भारतीय प्रशासन सेवेतील निवडणूक निरीक्षक हौलनलाल गौईटे यांनी सोमवारी संगमनेर मतदार संघातील मतदान केंद्रांची पाहणी केली. तसेच काही उमेदवार आणि त्यांच्या प्रतिनिधींची संवाद देखील साधला असल्याची माहिती संगमनेरचे निवडणूक निर्णय अधिकारी शैलेंद्र हिंगे यांनी दिली आहे.
निवडणूक निरीक्षक हौलनलाल गौईटे यांचा मुक्काम संगमनेरच्या शासकीय विश्रामगृहात असून त्यांचा ८७८८४९१६४१ हा संपर्क क्रमांकदेखील जाहीर करण्यात आला आहे. संगमनेर विधानसभा मतदारसंघातील जास्तीत जास्त मतदारांनी मतदान करण्याच्या आवाहनाबरोबरच आचारसंहितेच्या अंमलबजावणीसाठी निवडणूक यंत्रणेने सतर्क राहून कामकाज करण्याच्या सूचना त्यांनी यावेळी निवडणुकीशी संबंधित यंत्रणांना दिल्या. केंद्रीय निवडणूक आयोगाने महाराष्ट्र विधानसभा निवडणूक अंमलबजावणीवर देखरेख ठेवण्यासाठी तीन निवडणूक निरीक्षकांच्या नेमणुका केल्या आहे यात सामान्य, पोलीस व खर्च निरीक्षकांचा समावेश आहे.
संगमनेर आणि अकोले विधानसभा मतदार संघासाठी हौलीनलाल गौईटे यांची निवडणूक निरीक्षक (सामान्य) म्हणून नियुक्ती केली असल्याने त्यांनी सोमवारी संगमनेर विधानसभा मतदारसंघातील निवडणूक कामकाजाचा आढावा घेतला घेतला. आदर्श आचारसंहितेची काटेकोरपणे अंमलबजावणी करण्यासाठी निवडणूक यंत्रणेने सतर्क राहून कामकाज करावे, अशा सूचना त्यांनी यावेळी दिल्या.
त्यांनी निवडणुकीचे नोंदणी कार्यालय, स्ट्रॉंग रूम, एमसीसी, कंट्रोल रूम, साहित्य विभाग, कार्यालयात असलेली सीसीटीव्ही आणि आचारसंहिता कक्षाची पाहणी केली. नियंत्रण कक्षाला भेट देऊन आदर्श आचारसंहितेची काटेकोरपणे अंमलबजावणी करण्याबाबत त्यांनी निर्देश दिले.
गौईटे म्हणाले, प्रचार सभा, मिरवणुका व कार्यक्रमांवर केल्या जाणाऱ्या खर्चावर निगराणीसाठी असलेल्या पथकांनी अत्यंत बारकाईने व्हिडिओ चित्रीकरण करावे. कुठल्याही पथकाच्या माध्यमातून अथवा कुठल्याही चेकपोस्टवर कारवाई करताना अथवा तपासणी तसेच कारवाई करताना निवडणूक आयोगाच्या अपेक्षेप्रमाणे फलनिष्पत्तीवर भर देण्यात यावा. निवडणूकीच्या निमित्ताने होणाऱ्या प्रत्येक अर्थविषयक बाबींवर अत्यंत सुक्ष्मपणे लक्ष द्यावे. वाहनांची तपासणी अधिक दक्षतापूर्वक करावी. पथकांनी त्यांना नेमून देण्यात आलेल्या जबाबदारीप्रमाणे प्रभावीपणे काम करावे. 
भरारी पथकाच्या अधिकाऱ्यांनी प्रत्येक गोष्टींची नोंद ठेवून सहाय्यक खर्च निरीक्षकांच्या संपर्कात राहावे. मतदारांना प्रभावित करण्यासाठीच्या रोख रक्कम, मद्य तसेच प्रतिबंधित पदार्थांच्या वाहतुकीस प्रतिबंध करावा. कारवाईमध्ये सातत्य ठेवावे, अशा सूचनाही त्यांनी केल्या. त्यांनी कायदा सुव्यवस्था, रोख रक्कम व मद्य जप्ती या विषयी आढावा घेतला.
निवडणूक निरीक्षक (सामान्य) हौलीनलाल गौईटे यांच्याशी ८७८८४९१६४१ या मोबाईल क्रमांकावर संपर्क साधता येणार आहे. त्यांचा मुक्काम सह्याद्री कक्ष, शासकीय विश्रामगृह संगमनेर येथे असणार आहे. संगमनेर-२१७ विधानसभा मतदानसंघातील ज्या व्यक्तींना निवडणूक प्रक्रिया संबंधीत संपर्क साधायचा झाल्यास दररोज (सार्वजनिक सुट्टी वगळून) सकाळी ११.०० ते ११.३० या वेळेत शासकीय विश्रामगृह संगमनेर येथे ते उपलब्ध असणार आहेत.
