शुक्रवार, ०८ नोव्हेंबर
विधानसभा निवडणुकीचा प्रचार रंगात येऊ लागला असून महाविकास आघाडीच्या उमेदवाराच्या प्रचारासाठी माजी मंत्री अमित देशमुख आणि खासदार डॉ. अमोल कोल्हे रविवारी तळेगाव दिघे येथे युवक मेळाव्याच्या निमित्ताने येत आहे, अशी माहिती युवक काँग्रेस अध्यक्ष डॉ. जयश्री थोरात यांनी दिली.
संगमनेर विधानसभा मतदारसंघातून नवव्यांदा निवडणूक लढविणाऱ्या महाविकास आघाडीचे उमेदवार बाळासाहेब थोरात यांच्या प्रचारार्थ रविवारी तळेगाव दिघे येथे युवक मेळाव्याचे आयोजन करण्यात आले आहे. रविवारी (१० नोव्हेंबर) संध्याकाळी पाच वाजता होणाऱ्या या मेळाव्यासाठी विविध मान्यवर उपस्थित राहणार आहे. तळेगाव दिघे येथे हे दोन्ही नेते विरोधकांवर टीका करताना काय भाष्य करतात याकडे मतदारांचे लक्ष लागले आहे.
आमदार बाळासाहेब थोरात हे तालुक्यातील जनतेच्या पाठबळावर नवव्या वेळेस निवडणूक लढवत असून तालुक्यासाठी ही मोठी अभिमानाची बाब आहे. थोरात यांनी निळवंडे धरण व कालवे पूर्ण करून दुष्काळग्रस्तांना पाणी दिले आहे. संगमनेर शहरात विविध वैभवशाली इमारती उभ्या केल्या असून शहर हायटेक केले आहे. सहकार, शिक्षण व शेती क्षेत्रातील प्रगतीमुळे ग्रामीण अर्थव्यवस्था मजबूत करून त्यांनी तालुक्याला वैभव प्राप्त करून दिले आहे.
विधानसभेतील सर्वात ज्येष्ठ सदस्य, सुसंस्कृत नेतृत्व म्हणून राज्यभर त्यांची ओळख असून महाविकास आघाडीच्या समन्वयाची जबाबदारी पक्षाने त्यांच्यावर दिली आहे. थोरात राज्यभर महाविकास आघाडीच्या प्रचाराची जबाबदारी सांभाळत आहे. 
मेळाव्यासाठी संसद रत्न खासदार कोल्हे, माजी मंत्री देशमुख यांच्यासह बाळासाहेब थोरात, माजी आमदार डॉ. सुधीर तांबे, आमदार सत्यजित तांबे, दुर्गाताई तांबे, शिर्डी विधानसभेच्या महाविकास आघाडीच्या प्रभावती घोगरे, शिवसेनेचे माजी शहर अध्यक्ष अमर कतारी, राष्ट्रवादी शरदचंद्र पवार पक्षाचे कोपरगावचे उमेदवार संदीप वर्पे आदींसह महाविकास आघाडीचे पदाधिकारी उपस्थित राहणार आहे.
या मेळाव्यासाठी युवक युवतींनी मोठ्या संख्येने उपस्थित राहण्याचे आवाहन महाविकास आघाडी, मित्र पक्षाच्यावतीने करण्यात आले आहे.
