रविवार, १० नोव्हेंबर
जीभ घसरलेल्या भाजप खासदार धनंजय महाडिक यांनी केलेल्या विधानामुळे आणि दमदाटीमुळे त्यांच्यावर जोरदार टीका होत आहे. खासदार महाडिक यांनी लाडकी बहीण योजनेअंतर्गत दीड हजार रुपये घेणाऱ्या महिला जर काँग्रेसच्या रॅलीत दिसल्या तर त्यांचे फोटो काढून घ्या, नाव लिहून घ्या आणि आम्हाला पाठवा. त्यांची व्यवस्था आम्ही करू, असं वक्तव्य केलं आहे.
राज्यात विधानसभा निवडणुकीचे वातावरण तापले आहे. आपल्या उमेदवाराच्या प्रचारार्थ नेत्यांच्या, पुढाऱ्यांच्या सभा भाषणांनी वेग घेतला आहे. आरोप-प्रत्यारोप सुरू आहेत. या भाषणांमधून अनेक नेत्यांची जीभ घसरत असल्याचे समोर येत आहे. पैसे घेतले तर आम्हालाच मते द्यावी लागतील, अशी इशारा वजा धमकी सत्ताधारी गटाचे आमदार रवी राणा यांच्यासह अनेक नेत्यांनी याआधी दिल्या आहेत. संगमनेरमध्ये सुजय विखे यांच्या सभेत भाजपच्या वसंत देशमुख या वाचाळवीराने माजी मंत्री काँग्रेसचे ज्येष्ठ नेते बाळासाहेब थोरात यांच्या मुली संदर्भात केलेल्या वक्तव्यामुळे राज्यात संतापाचे वातावरण असतानाच आता त्यात पुन्हा एकदा महाडिक यांच्या वक्तव्याची भर पडली आहे.
लोकसभेत मोठा फटका बसल्यानंतर सत्ताधारी महायुती सरकारने विधानसभेच्या तोंडावर महिलांची मते डोळ्यासमोर ठेवून मुख्यमंत्री माझी लाडकी बहीण योजना सुरू केली. सरकारच्या प्रमुख नेत्यांनी आचारसंहितेपूर्वी संपूर्ण महाराष्ट्रात मेळावे घेऊन या योजनेचा प्रचार-प्रसार केला. योजनेच्या माध्यमातून आतापर्यंत महिलांना ५ महिन्यांचे साडे सात हजार रुपये मिळाले आहेत. या माध्यमातून महिलांच्या मतांची पेरणीच सत्ताधाऱ्यांनी केल्याचे बोलले जात आहे.
महाडिक यांनी लाडक्या बहिणींनाच भरसभेत दमदाटी केली असल्याने याचा व्हिडिओ सध्या समाज माध्यमांवर मोठ्या प्रमाणात व्हायरल होतोय. यावर सतेज पाटील यांनी महाडिक यांचा व्हिडिओ शेअर करत टीका केली आहे. भाजप खासदार धनंजय महाडिक यांची मुजोरी, महिलांना जाहीर सभेत धमकी, असे सतेज पाटील यांनी म्हटले आहे.
https://x.com/satejp/status/1855264608673800650?s=19
काय म्हणाले धनंजय महाडिक …
भाजप उमेदवाराच्या प्रचारार्थ आयोजित सभेत भाजपचे राज्यसभा खासदार धनंजय महाडिक यांनी लाडकी बहीण योजनेबाबत वादग्रस्त विधान केले. लाडकी बहीण योजनेअंतर्गत दीड हजार रुपये घेणाऱ्या महिला जर काँग्रेसच्या रॅलीत दिसल्या तर त्यांचे फोटो काढून घ्या. नाव लिहून घ्या आणि आम्हाला पाठवा. त्यांची व्यवस्था आम्ही करू. घ्यायचं आपल्या शासनाचं आणि गुण गायचे त्यांचे…असलं चालणार नाही, असे धनंजय महाडिक म्हणाले होते.
