सोमवार २५ नोव्हेंबर – मुंबई
गेल्या विधानसभेच्या तुलनेत या विधानसभेमध्ये महिला आमदारांची संख्या घटली आहे. एकीकडे सत्ताधारी महायुतीला लाडक्या बहिणींनी भरभरून पाठिंबा देताना स्पष्ट जनादेश दिला असताना दुसरीकडे मात्र सभागृहातील महिला आमदारांची संख्या कमी झाली आहे. विधिमंडळाच्या सभागृहात आता केवळ २१ महिला आमदार दिसणार असून यात सर्वाधिक १४ महिला आमदार भारतीय जनता पक्षाच्या आहे.
केवळ अडीचशे महिला उमेदवार – निवडणुकीपूर्वी राज्य सरकारने आणलेल्या लाडकी बहीण योजनेला महिलांचा प्रचंड प्रतिसाद मिळाला असताना दुसरीकडे मात्र महिला उमेदवारांना नाकारल्याचे समोर येत आहे. यंदा विधानसभा निवडणुकीत २८८ जागांसाठी एकूण ४ हजार १३६ उमेदवार निवडणुकीच्या रिंगणात होते. त्यापैकी २५० च्या आसपास लाडक्या बहिणी उमेदवार होत्या. म्हणजेच एकूण उमेदवाराच्या सहा ते सात टक्केच महिलांना संधी मिळाली. त्यात आता निवडून आलेल्या महिला उमेदवारांची संख्याही ७ टक्क्यांच्या घरातच आहे.
पक्षनिहाय महिला आमदार – विधिमंडळाच्या नव्या सभागृहात निवडणूक निकालानंतर अवघ्या २१ महिला उमेदवार असलेल्या लाडक्या बहिणी यशस्वी ठरल्या आहेत. सर्वाधिक भाजपाच्या १४ महिला आमदारांमध्ये १० महिला आमदार पुन्हा निवडून आले असून भोकरमधील श्रीजया चव्हाण, कल्याण पूर्वमधून सुलभा गायकवाड, वसईममधून स्नेहा पंडित, फुलांब्रीमधून अनुराधा चव्हाण या चौघींचा नव्याने सभागृहात प्रवेश झाला आहे. शरद पवार यांनी आपल्या पक्षाकडून १० महिलांना संधी दिली होती मात्र यातील एकही महिला सभागृहात पोहोचू शकली नाही. तर अजित पवार यांच्या राष्ट्रवादी काँग्रेस कडून चार व एकनाथ शिंदे यांच्या शिवसेनेकडून दोन तसेच काँग्रेसकडून अवघी एक महिला आमदार झाली आहे.
मागील स्थिती – २०१९ मध्ये भाजपाने १२ महिला उमेदवारांना संधी दिली होती. तर, शिवसेनेने ९, काँग्रेसने १५ आणि राष्ट्रवादी काँग्रेस पक्षाने ९ महिला उमेदवारांना संधी दिली होती. म्हणजेच मुख्य प्रवाहातील पक्षांनी ४५ महिला उमेदवार उभे केले होते. त्यापैकी फक्त २४ महिला उमेदवार जिंकल्या.
पुढील निवडणुकीत ९६ महिला आमदार अपेक्षित – २८८ सदस्यांच्या विधानसभेत फक्त २४ महिला आमदार म्हणजेच फक्त ८ टक्के महिला आमदार होत्या. तर यावेळी २१ महिला उमेदवार जिंकल्याने ही टक्केवारी ७ टक्क्यांवर आली आहे. सप्टेंबर २०२३ मध्ये राज्यात ३३ टक्के महिला आरक्षणाचा ठराव पास करण्यात आला. पुढची जनगणना झाल्यानंतर ३३ टक्के आरक्षणाचे बिल अंमलात येणार आहे. तेव्हा सभागृहात २८८ पैकी ९६ महिला आमदार असणं अपेक्षित असेल. त्यामुळे सभागृहात महिला प्रतिनिधींचा आवाज वाढवण्याकरता आता २०२९ च्या निवडणुकीची प्रतीक्षा करावी लागणार आहे.
मतदारसंघनिहाय सभागृहात दिसणाऱ्या महिला आमदारांची नावे व पक्ष –
चिखली – श्वेता महाले (भारतीय जनता पक्ष)
जिंतूर – मेघना बोर्डीकर (भारतीय जनता पक्ष)
नाशिक मध्य – देवयानी फरांदे (भारतीय जनता पक्ष)
नाशिक पश्चिम – सीमा हिरे (भारतीय जनता पक्ष)
बेलापूर – नंदा म्हात्रे (भारतीय जनता पक्ष)
दहिसर – मनीषा चौधरी (भारतीय जनता पक्ष)
गोरेगाव – विद्या ठाकूर (भारतीय जनता पक्ष)
पर्वती – माधुरी मिसाळ (भारतीय जनता पक्ष)
शेवगाव – मोनिका राजळे (भारतीय जनता पक्ष)
केज – नमिता मुंदडा (भारतीय जनता पक्ष)
भोकरी – श्रीजया चव्हाण (भारतीय जनता पक्ष)
कल्याण पूर्व – सुलभा गायकवाड (भारतीय जनता पक्ष)
वसई – स्नेहा पंडित (भारतीय जनता पक्ष)
फुलंब्री – अनुराधा चव्हाण (भारतीय जनता पक्ष)
साक्री – मंजुळा गावित (शिवसेना एकनाथ शिंदे)
कन्नड – संजना जाधव (शिवसेना एकनाथ शिंदे)
अमरावती – सुलभा खोदके (राष्ट्रवादी काँग्रेस अजित पवार)
देवळाली – सरोज अहिरे (राष्ट्रवादी काँग्रेस अजित पवार)
अनुशक्ती नगर – सना मलिक (राष्ट्रवादी काँग्रेस अजित पवार)
श्रीवर्धन – आदिती तटकरे (राष्ट्रवादी काँग्रेस अजित पवार)
धावरी – ज्योती गायकवाड (काँग्रेस)
