शनिवार, ३० नोव्हेंबर
हल्ली निवडणुकीच्या माध्यमातून लोकशाही मूल्य उद्ध्वस्त होत असल्याची टीका ज्येष्ठ कामगार नेते डॉ. बाबा आढाव यांनी केली. तसेच या प्रकाराचा निषेध म्हणून ९५ वर्षीय योद्धा अर्थात डॉ. बाबा आढाव यांनी गुरुवारी पुण्यात आत्मक्लेश आंदोलन पुकारले आहे. शनिवारी तिसऱ्या दिवशीही हे आंदोलन सुरूच होते. 
शरद पवारांनी घेतली भेट – दरम्यान, राष्ट्रवादी काँग्रेस (शरद पवार) पक्षाचे अध्यक्ष शरद पवार यांनी शनिवारी सकाळी डॉ. बाबा आढाव यांची भेट घेतली. आढाव यांच्या आंदोलनाला राज्यातून पाठिंबा मिळत असून, डॉ. आढाव यांच्या समर्थनार्थ शनिवारी राज्यातील जिल्ह्यांमध्येही असेच आत्मक्लेश आंदोलन करण्यात येत आहे.
आज उपोषण थांबविणार – डॉ. आढाव यांच्याबरोबरच सामाजिक कार्यकर्ते नितीन पवार, गोरख मेंगडे यांनीही आपले उपोषण सुरू ठेवले आहे. ३० नोव्हेंबरला (शनिवारी) उपोषण थांबवणार असल्याचे डॉ. आढाव यांनी जाहीर केले आहे.
सहकारी चिंतेत – वयाच्या ९५ व्या वर्षी डॉ. आढाव यांनी सुरू केलेल्या या उपोषणामुळे कामगार चळवळीतील त्यांचे सहकारी चिंतित असून, त्यांच्या प्रकृतीची काळजी घेतली जात आहे.
यांनी घेतली भेट – महात्मा गांधी भवनचे अध्यक्ष डॉ. कुमार सप्तर्षी, माजी मंत्री, आमदार डॉ. विश्वजीत कदम, ज्येष्ठ नेते मोहन जोशी, रमेश बागवे, किरण मोघे, मेधा थत्ते, भाई संपतराव पवार, धनाजी गुरव व अन्य स्थानिक पदाधिकारी, नेते यांनी उपोषणस्थळी येऊन डॉ. आढाव यांची भेट घेत त्यांच्या प्रकृतीची विचारपूस केली.
आत्मक्लेश आंदोलन का…
निवडणूक प्रक्रियेबाबत नागरिकांकडून शंका व्यक्त केल्या जात आहेत. त्याचे निराकरण करण्याची जबाबदारी सरकारची आहे. सरकार ती पाळत नसेल तर नागरिकांना त्याविरोधात आवाज उठविण्याशिवाय दुसरा पर्याय नाही, त्यामुळेच हे आत्मक्लेश आंदोलन आहे. – डॉ. बाबा आढाव, ज्येष्ठ कामगार नेते.
