रविवार, ०८ डिसेंबर – मुंबई
विधानसभा अध्यक्षपदाची निवड उद्या होत आहे, या पार्श्वभूमीवर महाविकास आघाडीतील प्रमुख नेत्यांनी रविवारी मुख्यमंत्री देवेंद्र फडणवीस यांची भेट घेत अध्यक्षपदाच्या निवडणुकीपूर्वी महाविकास आघाडीला विधानसभा उपाध्यक्षपद आणि विरोधी पक्षनेते पद मिळावं, असा प्रस्ताव फडणवीसांसमोर ठेवल्याची माहिती समोर येत आहे.
या नेत्यांनी घेतली भेट – मुख्यमंत्री देवेंद्र फडणवीस यांची भेट घेणाऱ्यांमध्ये महाविकास आघाडीतील भास्कर जाधव, नाना पटोले, विजय वडेट्टीवर यांचा समावेश होता. बहुमत बघता विधानसभा अध्यक्षपदासाठी राहुल नार्वेकर यांची निवड निश्चित असल्याने या नेत्यांनी महाविकास आघाडीच्या वतीने उपाध्यक्षपदाची मागणी केली आहे.
विधानसभा अध्यक्ष पदासाठी नार्वेकर निश्चित – विधानसभा निवडणुकीत प्रचंड बहुमत मिळवत महायुतीने सरकार स्थापन केलं. सध्या विधानसभेचं विशेष अधिवेशन घेतलं जात आहे. त्यामध्ये २८८ आमदारांनी शपथ ग्रहण केली. त्यानंतर आता विधानसभेच्या अध्यक्षाची निवड केली जाणार आहे. त्यासाठी महायुतीचे राहुल नार्वेकर यांनी उमेदवारी अर्ज दाखल केला आहे.
बहुमत बघता विरोधकांकडून उमेदवार देण्याची आशा मावळली – महायुतीकडे असलेले बहुमत बघता राहुल नार्वेकर यांच्या विरोधात महाविकास आघाडी विधानसभा अध्यक्षपदासाठी कोणताही उमेदवार देणार नाही. तसेच, सत्ताधाऱ्यांकडून विधानसभा उपाध्यक्षपद आणि विरोधी पक्षनेतेपद मिळावं असा प्रस्ताव महाविकास आघाडीच्या नेत्यांनी फडणवीसांसमोर ठेवला आहे. महाविकास आघाडीकडे ४८ आमदाराचे संख्याबळ आहे. त्यामुळे हा विचार करुन विधानसभेचे विरोधी पक्षनेतेपद हे महाविकास आघाडीला द्यावे असा प्रस्ताव या नेत्यांनी फडणवीसांसमोर ठेवला.
