रविवार, ०८ डिसेंबर – नवी दिल्ली
मोदी सरकार जीएसटीमध्ये नवीन कर टप्पा तयार करण्याच्या तयारीत असून यामध्ये जनतेसाठी जीवनावश्यक ठरलेल्या वस्तूंवरील जीएसटी करामध्ये वाढ करण्याची योजना आखली जात आहे. तर उद्योगपतींना सूट दिली जात आहे या पार्श्वभूमीवर सरकारच्या नवीन कर धोरणावर काँग्रेस नेते राहुल गांधी यांनी प्रश्न उपस्थित केले आहे.
राहुल गांधी म्हणाले की, असे ऐकण्यात येत आहे की, जीएसटीच्या वाढत्या संकलनादरम्यान, सरकार एक नवीन कर टप्पा आणणार आहे. आपल्याला आवश्यक असलेल्या गोष्टींवर जीएसटी वाढवण्याची योजना आहे. तसेच, जरा विचार करा सध्या लग्नाचा हंगाम सुरू आहे, लोक पैसे जमा करत आहेत आणि दरम्यान सरकार १५०० रुपयांच्या वरच्या कपड्यांवरील जीएसटी १२ टक्क्यांवरून १८ टक्क्यांपर्यंत वाढवणार आहे.
मेहनतीची कमाई लुटली जात आहे – उद्योगपतींचे कर्ज माफ करण्यासाठी गरीब व मध्यमवर्गीयांची मेहनतीची कमाई लुटली जात आहे. या अन्यायाविरोधात आमची लढाई आहे. आम्ही कर वसुलीबाबत आवाज उठवणार आहोत. ही लूट रोखण्यासाठी सरकारवर दबाव बनवू, असे त्यांनी सांगितले.
