शुक्रवार १३ डिसेंबर
सहा वर्षाच्या मुलीसह चित्रपट पाहून स्कुटीवरून घरी परतत असलेल्या संगमनेर महाविद्यालयातील महिला प्रोफेसरला शहरालगतच्या घुलेवाडी फाट्याजवळ चार चाकी वाहनाने दिलेल्या धडकेत माय-लेकी जखमी झाल्या आहे. जखमी मायलेकींवर शहरातील खासगी रुग्णालयात उपचार सुरू आहे. 
यासंदर्भात जखमी असलेल्या प्रोफेसर ललिता बाबुलाल मालुसरे सोनवणे यांनी दिलेल्या फिर्यादीवरून एम. एच. 05 – 8886 या चार चाकी वाहनाच्या अज्ञात चालकाविरोधात मोटर वाहन कायदा आणि भारतीय न्याय संहिता कायद्याअंतर्गत गुन्हा दाखल करण्यात आला आहे.
यासंदर्भात अधिक माहिती अशी, बुधवारी (११ डिसेंबर) रात्री साडेनऊ वाजण्याच्या सुमारास प्रोफेसर मालुसरे या आपल्या सहा वर्षे वयाच्या मुलीसह घुलेवाडी येथील छोटू महाराज टॉकीजमध्ये चित्रपट पाहून आपल्या स्कुटीवरून गोल्डन सिटी येथील घराकडे परतत असताना घुलेवाडी फाट्याजवळ समोरून विरुद्ध बाजूने हुंदाई कंपनीच्या सफेद रंगाच्या चार चाकी वाहनाने त्यांना जोराची धडक दिली.
या अपघातात प्रोफेसर मालुसरे आणि त्यांची मुलगी पृथ्वी या दोघीही जखमी झाल्याने त्यांना उपचारासाठी तातडीने संगमनेरमधील खाजगी रुग्णालयात दाखल करण्यात आले होते. घटनेची माहिती मिळतात पोलिसांनी घटनास्थळी जात तसेच जखमी मालुसरे यांच्या जबाबावरून वाहन चालकाविरुद्ध गुन्हा दाखल केला आहे. अधिक तपास शहर पोलीस ठाण्यातील पोलीस हवालदार अशोक पारधी करत आहे.
