सोमवार ३० डिसेंबर
नवी दिल्ली : राज्यात विधानसभा निवडणूक पार पडल्यानंतर मोठ्या बहुमताने सत्तेवर आलेल्या भाजपमध्ये लवकरच संघटनात्मक पातळीवर मोठे फेरबदल होणार असून, महाराष्ट्रासह सात राज्यांचे भाजप अध्यक्ष बदलण्यात येणार असल्याची माहिती समोर येत आहे. तसेच फेब्रुवारीच्या पहिल्या आठवड्यात पक्षाला नवा राष्ट्रीय अध्यक्ष मिळण्याची शक्यता आहे.
या राज्यात बदल – मध्य प्रदेश, महाराष्ट्र, उत्तर प्रदेश, गुजरात, पश्चिम बंगाल, जम्मू-काश्मीर आणि झारखंडमधील प्रदेशाध्यक्ष बदलले जाणार आहेत. मात्र, भाजपच्या घटनेनुसार या फेरबदलांपूर्वी पक्षाला ५० टक्के राज्यांमध्ये संघटनात्मक निवडणुका पूर्ण कराव्या लागणार आहेत.
राज्यात विद्यमान प्रदेशाध्यक्ष मंत्री – नुकत्याच पार पडलेल्या विधानसभा निवडणुकीनंतर महाराष्ट्रात विद्यमान प्रदेशाध्यक्ष चंद्रशेखर बावनकुळे यांना मंत्रिमंडळात स्थान देण्यात आले आहे. याशिवाय त्यांच्याकडे महसूलसारखे महत्त्वाचे खाते सोपविण्यात आले असल्याने प्रदेशाध्यक्षपदासाठी रवींद्र चव्हाण यांचे नाव चर्चेत आहे.
दिल्लीत झाली बैठक – संघटनात्मक निवडणुकांबाबत रविवारी दिल्लीत भाजपची बैठक झाली, त्यात या निवडणुकांबाबत चर्चा करण्यात आली. पक्षाचे अध्यक्ष जेपी नड्डा, संघटनेचे सरचिटणीस बी. एल. संतोष यांच्याशिवाय सर्व राष्ट्रीय सरचिटणीस, राज्यांचे प्रदेशाध्यक्ष, संघटना मंत्री, संघटना निवडणूक प्रभारी व सहप्रभारी या बैठकीला उपस्थित होते.
निवडणुकांमुळे नड्डा यांचा कार्यकाळ वाढवला – जे. पी. नड्डा यांना जून २०१९ मध्ये पक्षाचे कार्यकारी अध्यक्ष आणि जानेवारी २०२० मध्ये पूर्णवेळ अध्यक्ष बनवण्यात आले. पक्षाध्यक्षाचा कार्यकाळ ३ वर्षांचा असतो. त्यामुळे नड्डा यांचा कार्यकाळ २०२३ मध्येच संपला आहे. मात्र लोकसभा आणि विधानसभा निवडणुकांमुळे त्यांचा कार्यकाळ वाढवण्यात आला होता. भाजपच्या घटनेनुसार एखादी व्यक्ती जास्तीत जास्त दोन टर्म लागोपाठ अध्यक्ष राहू शकते. मात्र, नड्डा यांचा केंद्रीय मंत्रिमंडळात समावेश झाल्यानंतर त्यांची पुन्हा अध्यक्ष होण्याची शक्यता संपुष्टात आली आहे. भाजपच्या ‘एक व्यक्ती-एक पद’ या नियमामुळे नड्डा सध्या अध्यक्ष होऊ शकत नाही.
