बिबट्याच्या हल्ल्यात शेतात खेळणाऱ्या ९ वर्षाच्या बालकाचा मृत्यू

महाराष्ट्र संवाद न्यूज
शेतात आईवडील कापुस वेचत असताना जवळच शेतात खेळत असलेल्या ९ वर्षीय बालकावर बिबट्याने हल्ला केल्याने त्याचा जागीच मृत्यू झाल्याची घटना वैजापूर तालुक्यातील कविटखेडा येथे बुधवारी (ता. १५ जानेवारी) रोजी घडली आहे.
या घटनेने परिसरातील शेतकऱ्यात खळबळ उडाली आहे. महेश सिद्धार्थ आखडे असे घटनेत मुत्यु झालेल्या शेतमजूर मुलांचे नाव आहे.
याबाबत माहिती अशी की, गोरख चव्हाण यांच्या कविटखेडा शिवारातील गट क्रं १३३ मध्ये सकाळी ११ वाजेच्या दरम्यान घडली. कविटखेडा शिवारात शेतातील कामे करण्यासाठी मध्यप्रदेश येथील शेतमजूर सकाळी कापूस वेचणीसाठी गेले होते. दरम्यान, त्यांचा ९ वर्षांचा मुलगा महेश हा शेतातच खेळत असताना दडी धरून बसलेल्या बिबट्याने अचानक त्याच्यावर झडप मारुन प्राणघातक हल्ला केला. हल्ल्यात बिबट्याने महेशच्या मानेवर आणि गळ्यावर जोराचा चावा घेतल्याने त्याचा जागीच मृत्यू झाला.
ही बाब त्याच्या शेतमजूर आई-वडिलांना कळल्याने त्यांनी जोरात आरडाओरड केली. त्यामुळे शेजारील शेतात सुरु असलेल्या ट्रॅक्टर चालकाने घटनास्थळी ट्रॅक्टरसह धाव घेतल्याने बिबट्याने ज्वारीच्या शेतात पळ काढला.
महिनाभरात लहान बालकांवर बिबट्याचा हल्ला होण्याची ही दुसरी वेळ असताना वनविभागाने मात्र झोपेचं सोंग घेतले आहे. बिबट्याने दहशत माजवली असताना वनविभागाने अद्यापही ठोस कारवाई मात्र केली नाही. परिणामी एका बालकाला आपला जीव गमवावा लागला आहे. याआधी २९ डिसेंबर रोजी तलवाडा परीसरात लहान मुलीवर बिबट्याने हल्ला केला होता. मात्र, एका महिलेच्या तर सतर्कतेमुळे तिचे प्राण वाचले होते.