संगमनेर दि. २९-
रात्रीच्या वेळी गस्त घालत असतांना संगमनेर तालुका पोलिसांनी निळवंडे शिवारात संशयास्पदरित्या फिरणाऱ्या इंडिका कारचा पाठलाग करून दरोड्याच्या तयारीत असलेल्या तिघांना पकडले तर या कारवाईदरम्यान दोघे पळून जाण्यात यशस्वी झाले. पोलिसांनी पकडलेल्या संशयित आरोपींकडून गावठी कट्टा, कोयता, चार मोबाईल, इंडिका कार जप्त करण्यात आली असल्याची माहिती पोलीस निरीक्षक देविदास ढुमणे यांनी दिली.
मंगळवारी (दि. २८) पहाटे साडे पाच वाजेच्या तालुका पोलीस स्टेशनचे गस्तीचे अंमलदार पोलीस हेडकॉन्स्टेबल संपत जायभाये, चालक कोकणे हे मोबाईल पेट्रोलींग करून निळवंडे मार्गे करुन वडगावपानकडे येत असतांना त्यांना समोरून एक पांढऱ्या रंगाची इंडिका कार (क्र. एम. एच. २३ ई ६८४७) हि निळवंडे-कवठे कमळेश्वर रस्त्यांने वेगांने जात असतांना दिसली. त्यांना सदर वाहनाचा संशय आल्यांने त्यांनी कारचा पाठलाग सुरु केला.
पोलीस हेडकॉन्स्टेबल जायभाये यांनी इंडिका कार निळवंडेचे पाटालगत अडवली. कारमधील तरुणांची चौकशी करत असतांना त्यांना कार मधील तरुणांबद्दल संशय आला. हल्ली कार मधील तरुणांकडे विचारपूस केले असता त्यातील तिघांनी आपली नावे ललित अनिल थोरात (वय २४ वर्षे रा. थोरात वस्ती, वडगावपान), किरण संजय काळे (वय १९, रा. माळेगाव हवेली), गणेश चंद्रभान गायकवाड (वय २६, रा. खांडगाव) असे असल्याचे चौकशीत जायभाये यांना सांगितले. जायभाये चौकशी करत असतांना या संशयितांचे दोन अन्य साथीदार मात्र अंधाराचा फायदा घेत पळून गेले.
जायभाये यांनी या प्रकाराची माहिती रॉबरी पेट्रोलींगचे पोलीस उपनिरीक्षक एस. एस. सातपुते व पोलीस पथकाला दिली. होतं कातील कर्मचारी घटनास्थळी आल्यानंतर त्यांनी संशयित कारची झडती घेतली असता त्यात एक देशी बनावटीचे गावठी पिस्तुल, चार जिवंत काडतुस, कोयता, मिरची पुड, चार मोबाईल आढळून आले. पथकाने या मुद्देमालासह इंडिका कार ताब्यात घेतली.
संशयित आरोपींना पथकाने पोलीस स्टेशनला आणत त्यांना पोलिसी खाक्या दाखवताच आरोपीतांनी संगनमतांने रस्त्यावर येणारे जाणारे गाड्या चालकांनी बाजुला लावल्यानंतर डिझेल चोरी करत असल्याबाबत कबुली दिली.
पोलीस हेड कॉन्स्टेबल संपत जायभाये यांनी दिलेल्या फिर्यादीवरुन संगमनेर तालुका पोलीस स्टेशनला आरोपींविरोधात गुन्हा दाखल करण्यात आला आहे.
