पुणे, दि. ०५ फेब्रुवारी –
संत तुकाराम महाराजांचे अकरावे वंशज ह. भ. प. शिरीष महाराज मोरे (वय ३०) यांनी देहूतील आपल्या राहत्या घरात गळफास घेत आत्महत्या केली आहे. प्राथमिक माहितीनुसार आर्थिक विवंचनेतून त्यांनी आत्महत्या केल्याचा अंदाज असून या घटनेमुळे देहू गावावर शोककळा पसरली आहे.
पोलिसांकडून मिळालेल्या माहितीनुसार शिरीष महाराज मोरे यांनी सकाळी साडेआठ वाजण्याच्या सुमारास राहत्या घरी उपरण्याने गळफास घेऊन आत्महत्या केली. काही दिवसापूर्वीच मोरे यांनी नुकतेच नवीन घर बांधले होते. खालच्या मजल्यावर आई-वडील आणि वरच्या मजल्यावर ते राहत होते.
मंगळवारी रात्री ते आपल्या वरच्या खोलीत झोपण्यासाठी गेले होते. सकाळी साडेआठ वाजल्यानंतर देखील ते खाली आले नाही म्हणून घरातील लोकांनी वरच्या रूम जवळ जाऊन दरवाजा वाजवला असता दार उघडले गेले नाही. त्यामुळे दरवाजा तोडण्यात आला. त्यावेळेस मोरे यांनी पंख्याच्या हुकाला उपरण्याने गळफास घेतल्याचे निदर्शनास आले.
आत्महत्या करण्यापूर्वी शिरीष महाराजांनी चिठ्ठी लिहून ठेवली आहे त्यात त्यांनी आर्थिक विवंचनेतून आत्महत्या करत असल्याचा उल्लेख केला असल्याची प्राथमिक माहिती मिळत आहे. वीस दिवसांपूर्वी त्यांचा साखरपुडा झाला होता तर एप्रिल किंवा मे महिन्यात त्यांचा विवाह होणार होता. ते प्रवचन आणि कीर्तन करायचे.
या घटनेमुळे देहू गावावर शोककळा पसरली असून देहूरोड पोलीस पुढील तपास करत आहे.
