वारकरी धर्माने मराठी मनाची मशागत केली – रंगनाथ पठारे

संगमनेर, दि. ११ फेब्रुवारी –
वारकरी परंपरेचे सामाजिक समतेसाठी मोठे योगदान राहिले आहे. वारकरी संतांचे कार्य सामाजिक जडणघडणीसाठी ऐतिहासिक ठरले आहे. खऱ्या अर्थाने वारकरी धर्माने मराठी मनाची मशागत केली असल्याचे प्रतिपादन ज्येष्ठ साहित्यिक रंगनाथ पठारे यांनी केले. साहित्यिक पठारे यांच्या हस्ते ह. भ. प. ज्ञानेश्वर बंडगर लिखित ‘होय होय वारकरी’, व डॉ. श्रीरंग गायकवाड यांच्या संत एकनाथ महाराजांवरील विशेष अंकाचा प्रकाशन सोहळा रविवारी पार पडला.
संगमनेर तालुका वारकरी संघटना, श्री विठ्ठल मंदिर ऑफ नामदेव शिंपी समाज आणि सांदिपनी गुरुकुल, घुलेवाडी यांच्यावतीने या कार्यक्रमाचं आयोजन करण्यात आलं होतं. विठ्ठल मंदिर ऑफ नामदेव शिंपी समाजाच्या जनसखा भवनात पार पडलेल्या या कार्यक्रमाच्या अध्यक्षस्थानी ह. भ. प. दत्तात्रय महाराज भोर होते.
यावेळी पंढरपूरच्या संत विचारपिठाचे संस्थापक राजाभाऊ अवसक, ह.भ.प. सुदाम महाराज कोकणे, ह.भ.प. राम महाराज पवळ, सिताराम राऊत उपस्थित होते.
साहित्यिक रंगनाथ पठारे यांनी यावेळी प्रकाशित करण्यात आलेल्या अंकांचे कौतुक केले. वारकरी संप्रदायाचा समाज मनावर झालेला परिणाम आणि त्यांचे योगदान याविषयी त्यांनी यावेळी उपस्थितांना मार्गदर्शन केले.
पंढरपूर येथील मंदिर प्रवेशाचा दाखला देत संत नामदेव महाराजांच्या कार्याबद्दल राजाभाऊ अवसक यांनी माहिती देत प्रास्ताविक केले. यावेळी डाॅ. श्रीरंग गायकवाड, ह.भ.प. ज्ञानेश्वर बंडगर आणि ह.भ.प. सुदाम कोकणे यांनीही मनोगत व्यक्त केलं. ह. भ. प. बाळकृष्ण करपे यांनी आभार मानले. तर संजय जेडगुले यांनी सूत्रसंचालन केले.
कार्यक्रमादरम्यान एप्रिल २०२५ मध्ये होणाऱ्या श्री विठ्ठल मंदिराव नामदेव शिंपी समाज मंदिराच्या पुनर्स्थापनेच्या सोहळ्याची उद्घोषणा यावेळी करण्यात आली. कार्यक्रमासाठी राजेंद्र शित्रे, रजत अवसक, शशिकांत शेजवळ, प्रसाद अवसक यांनी मेहनत घेतली.