संगमनेर, दि. १८ फेब्रुवारी –
सकल मराठा समाजाच्यावतीन गेल्या दहा वर्षापासून १९ फेब्रुवारीला संगमनेर बस स्थानकाच्या प्रवेशद्वारापाशी शिवजयंती उत्सव साजरा केला जातो. यावर्षी मात्र या उत्सवाला गालबोट लागले आहे. काही मंडळींनी दादागिरी करून हा जयंती उत्सव रद्द करण्यास सकल मराठा समाजाला भाग पाडल्याची माहिती समोर येत आहे.
शिवजयंती उत्सवावरून संगमनेरमध्ये राजकारण तापलेले आहे. महायुतीच्यावतीने यावर्षी शिवजयंती उत्सव साजरा केला जाणार आहे, पूर्वनियोजित कार्यक्रमानुसार हा उत्सव संध्याकाळी मिरवणुकीने साजरा होणार होता. दरम्यान सकाळच्या सत्रात सकल मराठा समाजाच्यावतीने छत्रपती शिवाजी महाराज पुतळा ते बसस्थानकाच्या दरम्यान शिवजयंती उत्सव साजरा केला जाणार होता.
यामध्ये सकाळी छत्रपती शिवाजी महाराजांना अभिवादन, मॅरेथॉन, मर्दानी खेळ, लाईट शो, आरोग्य शिबिर, संध्याकाळी आतिषबाजी व पोवाड्याचा कार्यक्रम केला जाणार होता. त्या कार्यक्रमाची तयारी सुरू झालेली होती.
दरम्यान समोर आलेल्या माहितीनुसार, १७ फेब्रुवारीला विद्यमान लोकप्रतिनिधी अमोल खताळ यांनी त्यांच्या स्वतःच्या सोशल मीडिया अकाउंटवरून बस स्थानक ते छत्रपती शिवाजी महाराज पुतळा या परिसरातच मॅरेथॉन आणि इतर कार्यक्रमांचे आयोजन केल्याची पोस्ट केली. तर नेहमीप्रमाणे सोमवारी रात्री सकल मराठा समाजाच्यावतीने बसस्थानक परिसरात कमान उभारण्याचे काम सुरू होते, यावेळी महायुतीच्या काही पदाधिकाऱ्यांनी येऊन तुम्ही वेगळी शिवजयंती साजरी करू नका, महायुतीत सहभागी व्हा, असे सांगितले. त्यावर सकल मराठा समाजाने आम्ही अराजकीय जयंती साजरी करतो, याला मोठी परंपरा असल्याचे सांगितले.
दरम्यान रात्री बस स्थानकावर आलेले शिवसेना आमदार अमोल खताळ संबंधितांशी चर्चा करत असताना यावेळी काही कार्यकर्त्यांनी सकल मराठा समाजाच्या कार्यकर्त्यांना दादागिरी करत जयंती साजरी करू नका असे सुनावले. यावरून बसस्थानकावर रात्री मोठा राडा झाल्याची चर्चा असून या दादागिरीचा निषेध म्हणून सकल मराठा समाजाने जयंती साजरी न करण्याचा निर्णय घेतला.
सकल मराठा समाजाच्यावतीने सोशल मीडियावर महाराज आम्हाला माफ करा दहशत आणि दादागिरीमुळे आम्ही तुमची जयंती साजरी करू शकलो नाही, अशा आशयाच्या पोस्ट व्हायरल करून झालेल्या घटनेचा निषेध नोंदविला जात आहे. दरम्यान या संदर्भात माहिती घेण्यासाठी सकल मराठा समाजाच्या काही कार्यकर्त्यांशी संपर्क साधला असता त्यांनी झालेल्या घटनेला दुजोरा दिला आहे.
