मुंबई, दि. ७ मार्च – प्रतिनिधी
सत्तेत आल्यापासून महायुती सरकारने सुरू केलेल्या आयएएस अधिकाऱ्यांच्या बदल्यांचा धडाका अद्यापही सुरूच आहे. गुरुवारी रात्री राज्यातील आठ सनदी अधिकाऱ्यांच्या बदल्या करण्यात आल्या आहेत. अहिल्यानगरच्या रिक्त झालेल्या जागेवर यवतमाळ येथून पंकज आशिया जिल्हाधिकारी पदाचा पदभार घेतील. आशिया आता अहिल्यानगरचे नवे जिल्हाधिकारी असतील.
राज्य सरकारने गेल्या आठवड्यात सात सनदी अधिकाऱ्यांच्या बदल्या केल्या होत्या. अहिल्यानगरचे जिल्हाधिकारी सिद्धाराम सालीमठ यांची बदली पुण्याचे साखर आयुक्त म्हणून करण्यात आली होती. सालीमठ यांच्या जागेवर आता पंकज आशिया यांची नेमणूक करण्यात आली आहे.
बघा कोणत्या अधिकाऱ्याची कुठे झाली बदली?
१) यवतमाळ जिल्ह्याचे जिल्हाधिकारी पंकज अशिया यांची अहिल्यनगरच्या जिल्हाधिकारीपदी नियुक्ती.
२) MMRDA चे सहमहानगर आयुक्त असलेल्या राधाविनोद शर्मा यांची मीरा-भाईंदर आयुक्तपदी नियुक्ती.
३) मुंबईत अतिरिक्त विकास आयुक्त (उद्योग) असलेल्या एम. जे. प्रदीपचंद्रन यांची पुणे महापालिकेच्या अतिरिक्त आयुक्तपदी नियुक्ती.
४) छत्रपती संभाजीनगरमध्ये अतिरिक्त विभागीय आयुक्त असलेल्या बाबासाहेब बेलदार यांची छत्रपती संभाजीनगरमध्ये अल्पसंख्या विकास आयुक्तपदी नियुक्ती.
५) छत्रपती संभाजीनगर स्मार्ट सिटीचे मुख्य कार्यकारी अधिकारी जगदीश मिनियार यांची जालना जिल्हा परिषदेच्या मुख्य कार्यकारी अधिकारीपदी नियुक्ती.
६) सोलापूर स्मार्ट सिटीचे मुख्य कार्यकारी अधिकारी गोपीचंद कदम यांची ठाण्याच्या अतिरिक्त आदिवासी आयुक्तपदी नियुक्ती.
७) मुंबईत MSRDC च्या सह व्यवस्थापकीय संचालक असलेल्या वैदेही रानडे यांची रत्नागिरी जिल्हा परिषदेच्या मुख्य कार्यकारी अधिकारीपदी नियुक्ती.
८) नागपुरात विदर्भ विकास महामंडळाचे सचिव असलेले अर्जुन चिखले यांची शुल्क नियामक प्राधिकरणाच्या सचिवपदी नियुक्ती.
