साहेबांसोबत स्वतःसाठी साडेतीन लाख रुपये घेताना शिपाई एसीबीच्या जाळ्यात

शनिवार, दिनांक ८ मार्च
साहेबांशी बोलून मोजणी झालेल्या जमिनीच्या हद्दी खुणा दाखवून नकाशा काढून पूर्ण काम करून देण्याच्या मोबदल्यात चार लाख रुपये लाचेची मागणी करून साडेतीन लाख रुपये स्वीकारणाऱ्या भूमी अभिलेख कार्यालयातील शिपायाला लाच लुचपतच्या पथकाने पकडले आहे.
नितेंद्र काशिनाथ गाढे (वय ३५ वर्ष) असे साहेबांसाठी लाच स्वीकारणाऱ्या लाचखोर शिपायाचे नाव आहे.
पोलीस अधीक्षक शर्मिष्ठा वालावलकर यांच्या मार्गदर्शनाखाली पोलीस निरीक्षक मीरा आदमाने, पोलीस हवालदार पंकज पळशीकर, पोलीस हवालदार प्रमोद चव्हाणके यांनी ही कारवाई केली.
तक्रारदारांच्या मावशीची दीक्षि (ता.निफाड) येथे शेतजमीन आहे. या जमिनीच्या मोजणीसाठी त्यांनी भूमी अभिलेख कार्यालय निफाड येथे २५ जानेवारी २०२५ रोजी अर्ज केला होता. तक्रारदारांनी वारंवार पाठपुरावा केल्यानंतर सदर जमिनीची भूमी अभिलेख कार्यालयाकडून २८ फेब्रुवारी २०२५ रोजी मोजणी करण्यात आली.
मात्र, हद्दी खुणा दाखवायच्या बाकी होत्या. शिपाई गाढे याने भाबड उपाधीक्षक, भूमी अभिलेख यांच्या ओळखीचा तक्रारदारांच्यावर प्रभाव टाकला. भाबड यांच्याशी बोलून शुक्रवारी (दि.७) हद्दी खुणा दाखवून व नकाशा काढून काम पूर्ण करून देण्याच्या मोबदल्यात गुरुवारी (दि.६) स्वतःसाठी व भाबड यांच्या नावे चार लाख रुपये लाचेची मागणी केली. तडजोडीअंती साडेतीन लाख रुपये लाचेची मागणी करून ती शुक्रवारी (दि.७) स्वीकारली. त्यावेळी पथकाने त्यास अटक केली.