संगमनेर, दि. ९ मार्च – प्रतिनिधी
संगमनेर तालुक्यातील जागृत देवस्थान असलेल्या काकडवाडी येथील महालक्ष्मी माता मंदिरात जबरी चोरीची घटना समोर आली आहे. अज्ञात चोरट्यांनी ५१ डोळे सोन्याच्या मुकुटासह २ किलो वजनाच्या चांदीच्या वस्तूंची चोरी केल्याचे समोर आले आहे. अज्ञात चोरट्याने धार्मिक स्थळावर मोठा डल्ला मारल्याने गुन्हेगारांचा शोध घेण्याचे पोलिसांसमोर आव्हान निर्माण झाले आहे.
चोरीच्या घटनेची माहिती समोर येताच संगमनेरचे पोलीस उपाधीक्षक डॉ. कुणाल सोनवणे यांच्यासह पोलीस घटनास्थळी तातडीने हजर झाले होते. दरम्यान चोरट्यांनी मंदिरातून केवळ सोन्या-चांदीचे दागिनेच चोरले नाही तर सुरक्षेसाठी असलेल्या सीसीटीव्ही कॅमेऱ्याचा डीव्हीआर (DVR) देखील चोरून नेला आहे. रात्री उशिरापर्यंत या संदर्भात गुन्हा दाखल करण्याचे काम सुरू होते.
पोलीस उपाधीक्षक कुणाल सोनवणे, तालुका पोलीस ठाण्याचे पोलीस निरीक्षक देविदास ढुमणे यांनी घटनेची माहिती वरिष्ठांना कळविल्यानंतर अहिल्यानगरहून तात्काळ श्वानपथक आणि ठसे तज्ञांना प्राचारण करण्यात आले. स्थानिक गुन्हे शाखेचे पोलीस निरीक्षक दिनेश आहेर यांनी देखील घटनास्थळी भेट दिली. तपासा कामी पोलिसांची पथके रवाना करण्यात आली.
दरम्यान मंदिरात चोरी करणाऱ्या चोरट्यांचा तात्काळ शोध लावावा, अशी मागणी काकडवाडी गावाचे माजी सरपंच जनार्दन कासार यांनी केली आहे.
संगमनेर तालुक्याचे आमदार अमोल खताळ यांनी देखील महालक्ष्मी मंदिर येथे भेट देत झालेल्या चोरीच्या घटनेचा आढावा घेत पोलिसांना लवकरात लवकर अज्ञात चोरट्यांचा शोध घेण्याच्या सुचना केल्या आहेत.
