पोलिसांना गुंगारा देणाऱ्या गॅंगच्या म्होरक्याला नाशिक पोलिसांनी संगमनेरमधून उचलला… काय आहे प्रकार

संगमनेर, दि. १२ मार्च
दरोडा, जबरी चोरी, जिवे मारण्याचा प्रयत्न अशा गंभीर स्वरूपाच्या पाच गुन्ह्यांमध्ये पोलिसांना गुंगारा देणाऱ्या म्हस्के गँगच्या म्होरक्याला संगमनेरमधील गुंजाळवाडीमध्ये नाशिक पोलिसांच्या गुंडाविरोधी पथकाने शिताफिने जेरबंद केले आहे. संगमनेरमध्ये मंगळवारी या पथकाने कारवाई केली. आरोपीला उपनगर पोलिसांच्या ताब्यात देण्यात आले आहे.
सागर उर्फ सोनू सुरेश म्हस्के (वय २९, रा. भालेराव मळा, जय भवानी रोड, नाशिक रोड) असे संशयित म्होरक्याचे नाव आहे. दरोड्याच्या तयारीत असलेल्या त्याच्या टोळीला यापूर्वीच बेड्या ठोकल्या होत्या. तर फरार असलेल्या म्होरक्याला पकडण्यात आता यश आले आहे.
गेल्या २३ नोव्हेंबर रोजी जय भवानी रोडवरील शकुंतला पेट्रोल पंप परिसरात दरोड्याच्या तयारीत असलेली टोळी पोलिसांनी पकडली होती. पकडलेल्या संशयितांच्या ताब्यातून गावठी कट्टा, दोन जिवंत काडतुसे, कोयता, दोर, मिरची पूड असा ऐवज जप्त केला होता.
या कारवाईदरम्यान अंधाराचा फायदा घेऊन टोळीचा म्होरक्या असलेला संशयित आरोपी सागर म्हस्के फरार झाला होता. नाशिक पोलीस त्याच्या मागावर होते. संशयित आरोपी संगमनेरमध्ये दडून बसलेला असल्याची माहिती गुंडाविरोधी पथकाचे प्रभारी सहाय्यक निरीक्षक ज्ञानेश्वर मोहिते यांना मिळाली होती.
आरोपी संगमनेरमध्ये नेमका कोठे आहे याची माहिती पथकाला मिळत नव्हती. त्याचा कोणताही ठाव ठिकाणा माहीत नसताना पथकाने मानवी कौशल्य व तांत्रिक विश्लेषणाच्या आधारे तो शहरालगतच्या गुंजाळवाडीमधील लक्ष्मीनगरमध्ये असल्याची माहिती मिळविली. आरोपीला पकडण्यासाठी गेलेल्या पथकाने गुंजाळवाडीत त्याचा शोध सुरू केला असता आरोपीला याची चाहूल लागल्याने त्याने दुचाकीवरून पलायन करण्याचा प्रयत्न केला. मात्र पथकातील अधिकारी कर्मचाऱ्यांनी पाठलाग करून त्याला पकडले आणि ताब्यात घेतले.
त्याच्या विरोधात उपनगर आणि देवळाली कॅम्प पोलीस ठाण्यात गंभीर गुन्हे दाखल असून गुन्हे शाखेचे आयुक्त संदीप कर्णिक, उपयुक्त संदीप मिटके यांच्या मार्गदर्शनाखाली गुंडाविरोधी पथकाचे सहाय्यक निरीक्षक ज्ञानेश्वर मोहिते, अंमलदार विजय सूर्यवंशी, प्रदीप ठाकरे, भूषण सोनवणे, अक्षय गांगुर्डे, गणेश भागवत, राजेश राठोड, सुनील आडके, प्रवीण चव्हाण, अशोक आघाव, सुनीता कवडे आदींच्या पथकाने ही कारवाई केली.