संगमनेर, दि. १५ मार्च – प्रतिनिधी
संगमनेर शहर शिवसेनेच्या (उद्धव बाळासाहेब ठाकरे) प्रभारी शहर प्रमुख पदी रवींद्र कानकाटे यांची नियुक्ती करण्यात आली आहे. जिल्हा प्रमुखांच्या आदेशावरून सह संपर्कप्रमुख व उपजिल्हाप्रमुख यांनी ही निवड केली आहे.
कानकाटे यांना देण्यात आलेल्या नियुक्ती पत्रात म्हटले आहे की, सध्याचे शहर प्रमुख असलेले आप्पा केसेकर यांनी पक्षविरोधी काम केल्याने तसेच तिथीनुसार होत असलेल्या शिवजयंती साजरी करण्यासाठी कोणतीही जबाबदारी न घेतल्याने त्यांच्या पदाला आपण स्थगिती देत असल्याचे सहसंपर्कप्रमुख ॲड. दिलीप साळगट आणि उपजिल्हाप्रमुख अशोक सातपुते यांनी म्हटले आहे.
विद्यमान शहर प्रमुख यांच्या पदाला स्थगिती देत कानकाटे यांची प्रभारी शहर प्रमुख म्हणून नियुक्ती करत असल्याचे पत्रात म्हटले आहे. दोन दिवसांवर येऊन ठेपलेल्या शिवजयंती उत्सवाच्या पार्श्वभूमीवर नव्या प्रभारी शहर प्रमुखांची निवड करण्यात आली आहे.
न्याय मिळाला…
२० वर्षांपासून शिवसेना (ठाकरे) पक्षाचे काम करत असून या कालावधीत पक्षाने दिलेल्या जबाबदाऱ्या पार पाडल्या आहेत. पक्ष फुटीच्या काळात देखील आपण पक्षासोबत राहिलो आहोत. वीस वर्षानंतर न्याय मिळाल्याचे सांगत प्रभारी शहर प्रमुख पदाचा कार्यभार योग्य रीतीने सांभाळणार आहे. – रवींद्र कानकाटे प्रभारी शहर प्रमुख.
