संगमनेर नगरपरिषदेच्या पथ विक्रेता तक्रार निवारण समितीवर श्रीनिवास पगडाल आणि कृष्णा वालझाडे यांची निवड

Annant Ppangarkar

महाराष्ट्र संवाद न्यूज ऑनलाईन –
संगमनेर नगरपरिषद क्षेत्रासाठीच्या पथ विक्रेता तक्रार निवारण व विवाद निर्णय समितीवर संगमनेर नगरपरिषदेचे सेवानिवृत्त प्रशासन अधिकारी श्रीनिवास पगडाल आणि सेवानिवृत्त नायब तहसीलदार कृष्णा वालझाडे यांची सदस्य म्हणून निवड करण्यात आली आहे. यासंदर्भातील अधिकृत आदेश अहिल्यानगरचे जिल्हाधिकारी डॉ. पंकज आशिया यांनी नुकतेच पारित केले आहेत.
माहिती व तंत्रज्ञान आणि उच्च न्यायालयाच्या आदेशानुसार, पथ विक्रेता अधिनियम २०१४ व महाराष्ट्र पथ विक्रेता नियम २०१६ अन्वये राज्यातील प्रत्येक स्थानिक प्राधिकरणासाठी शासकीय तक्रार निवारण व विवाद निर्णय समिती स्थापन करण्याचे निर्देश देण्यात आले होते. त्यानुसार संगमनेर नगरपरिषद क्षेत्रासाठी संगमनेर येथील सह दिवाणी न्यायाधीश (कनिष्ठ स्तर) तथा न्यायदंडाधिकारी प्रथम वर्ग श्रीमती एस. बी. ढवळे यांच्या अध्यक्षतेखाली ही तीन सदस्यीय समिती गठीत करण्यात आली आहे.
या समितीत नवनिर्वाचित सदस्य श्रीनिवास पगडाल हे संगमनेर नगरपरिषदेचे सेवानिवृत्त प्रशासन अधिकारी असून त्यांनी लायन्स क्लब, साथी भास्करराव दुर्वे नाना स्मारक प्रतिष्ठान, कॉ. दत्ता देशमुख प्रतिष्ठान, संगमनेर नगरपालिका कामगार संघटना, आधार फाउंडेशन, सह्याद्री आनंदयात्री आणि राष्ट्र सेवा दल यांसारख्या विविध सामाजिक, सांस्कृतिक संस्थांच्या माध्यमातून उल्लेखनीय कार्य केले आहे.
तसेच दुसरे सदस्य कृष्णा वालझाडे यांनी नायब तहसीलदार म्हणून प्रशासकीय सेवेसह श्री साईबाबा संस्थान शिर्डी येथेही आपली सेवा बजावली आहे. याशिवाय माधव बाग आणि तिळवण तेली समाजाच्या माध्यमातून ते सामाजिक कार्यात सातत्याने सक्रिय आहेत. प्रशासकीय अनुभवाने समृद्ध असलेल्या या दोन्ही अभ्यासू व्यक्तींच्या निवडीमुळे संगमनेर शहरातील पथ विक्रेत्यांच्या प्रश्नांना योग्य न्याय मिळेल असा विश्वास व्यक्त केला जात असून, त्यांच्या निवडीबद्दल सर्व स्तरांतून अभिनंदन केले जात आहे.