राष्ट्रवादी काँग्रेसला मिळाल्या नव्या महिला प्रदेशाध्यक्ष रूपाली चाकणकरांच्या जागी कोण? तटकरे यांनी केली या नावाची घोषणा

महाराष्ट्र संवाद न्यूज ऑनलाईन 

मुंबई:

राष्ट्रवादी काँग्रेस (अजित पवार गट) पक्षाच्या महिला प्रदेशाध्यक्षपदी वैशाली नागवडे यांची नियुक्ती करण्यात आली असून प्रदेशाध्यक्ष सुनील तटकरे यांनी याबाबतची अधिकृत घोषणा केली आहे. रुपाली चाकणकर यांच्यानंतर पक्षाने पुन्हा एकदा पुणे जिल्ह्यातीलच नेतृत्वावर विश्वास दाखवत ही महत्त्वाची जबाबदारी सोपवली आहे.

मुंबईतील शासकीय निवासस्थानी पार पडलेल्या पक्षाच्या वरिष्ठ नेत्यांच्या बैठकीत आगामी निवडणुकांच्या पार्श्वभूमीवर पक्षसंघटन मजबूत करण्यासाठी रिक्त पदे भरण्याचा निर्णय घेण्यात आला. या बैठकीला प्रफुल पटेल, छगन भुजबळ, प्रदेशाध्यक्ष सुनील तटकरे, सुनेत्रा पवार आणि पार्थ पवार यांच्यासह प्रमुख नेते उपस्थित होते.

या बैठकीत महिला आघाडीची कमान वैशाली नागवडे यांच्याकडे सोपवण्यावर पक्षाच्या वरिष्ठ नेत्यांचे एकमत झाले. वैशाली नागवडे या पक्षाच्या प्रदेश प्रवक्त्या म्हणून कार्यरत असून त्यांनी यापूर्वी राष्ट्रवादी महिला काँग्रेसचे पुणे जिल्हाध्यक्षपद आणि प्रदेश सरचिटणीसपद यशस्वीरीत्या भूषवले आहे. पुणे जिल्ह्यातील आणि विशेषतः दौंड तालुक्यातील एक सक्रिय आणि आक्रमक चेहरा म्हणून त्यांची ओळख आहे.

त्यांच्या या नियुक्तीमुळे पक्षाच्या महिला आघाडीला नवी ऊर्जा मिळेल आणि संघटनात्मक बांधणी अधिक मजबूत होईल असा विश्वास पक्षाच्या नेत्यांनी व्यक्त केला आहे.