अहिल्यानगर, दि. २५ मार्च
येत्या काही दिवसात संगमनेर येथील सहकार महर्षी भाऊसाहेब थोरात सहकारी साखर कारखाना आणि प्रवरानगर येथील पद्मश्री डॉ. विठ्ठलराव विखे पाटील सहकारी साखर कारखाना यांच्या निवडणुका होणार आहेत. या निवडणुकांसाठी राज्य सहकारी निवडणूक प्राधिकरणाने निवडणूक निर्णय अधिकाऱ्यांची नियुक्ती केली आहे.
संगमनेर कारखान्यासाठी संगमनेरचे उपविभागीय अधिकारी शैलेश हिंगे यांची निवडणूक निर्णय अधिकारी म्हणून नियुक्ती करण्यात आली आहे. संगमनेरचे तहसीलदार धीरज मांजरे हे सहाय्यक निवडणूक निर्णय अधिकारी म्हणून काम पाहतील.
तर प्रवरानगर येथील विखे पाटील कारखान्यासाठी शिर्डीचे उपविभागीय अधिकारी माणिक आहेर यांची निवडणूक निर्णय अधिकारी म्हणून नियुक्ती करण्यात आली आहे. राहात्याचे तहसीलदार अमोल मोरे हे सहाय्यक निवडणूक निर्णय अधिकारी म्हणून काम पाहतील. राज्य सहकारी निवडणूक प्राधिकरणाने या नियुक्त्यांचे आदेश जारी केले आहेत.
संगमनेरचा सहकार महर्षी भाऊसाहेब थोरात सहकारी साखर कारखाना राज्याचे माजी मंत्री बाळासाहेब थोरात यांच्या नेतृत्वाखाली तर प्रवरानगरचा पद्मश्री डॉ. विठ्ठलराव विखे पाटील कारखाना राज्याचे जलसंपदा मंत्री राधाकृष्ण विखे यांच्या नेतृत्वाखाली कार्यरत आहे. पुढील आठवड्यात या दोन्ही कारखान्यांच्या निवडणुकीचा कार्यक्रम जाहीर होण्याची शक्यता आहे.
दरम्यान, राहुरी येथील डॉ. तनपुरे साखर कारखान्याच्या निवडणुकीचा कार्यक्रमही लवकरच जाहीर होण्याची शक्यता आहे. या कारखान्यासाठी निवडणूक निर्णय अधिकाऱ्यांची नियुक्ती होणे बाकी आहे. सहकारी निवडणूक प्राधिकरणाच्या माहितीनुसार, विखे आणि थोरात साखर कारखान्यांच्या प्रारूप मतदार यादीवर कोणतीही हरकत न आल्याने ती अंतिम करण्यात आली आहे.
त्यामुळे येत्या काही दिवसात या दोन्ही कारखान्याच्या निवडणुकांचा धुराळा उडणार असून गेल्या लोकसभा आणि विधानसभा निवडणुकीच्या पार्श्वभूमीवर या कारखान्याच्या निवडणुकांकडे लक्ष लागले आहे. विवेक कोल्हे यांनी थोरात यांच्या मदतीने गणेश सहकारी साखर कारखाना विखेंच्या ताब्यातून आपल्या ताब्यात आणण्यात यश मिळविले होते. थोरात यांनी प्रवरा कारखान्यात तर विखे यांनी संगमनेर कारखान्यात लक्ष घातल्यास या दोन्ही नेत्यांना निवडणुका जड जाण्याची चिन्हे आहेत. या पार्श्वभूमीवर या दोन्ही कारखान्यांच्या निवडणुकांकडे लक्ष लागले आहे.
