नाशिक, दि. २७ मार्च –
मुख्यमंत्री रोजगार निर्मिती कार्यक्रमांतर्गत बँक ऑफ महाराष्ट्रच्या गंगापूर रोडवरील थत्तेनगर येथील ॲग्री हायटेक शाखेतील तत्कालीन शाखाधिकारी सुभाष विठ्ठल कौटे (वय ४०, रा. संगमनेर) यांनी आपल्या पदाचा गैरवापर करत तब्बल ५ कोटी ५५ लाख ६६ हजार ५१३ रुपयांचा अपहार केल्याचा धक्कादायक प्रकार उघडकीस आला आहे.
कौटे यांनी मुख्यमंत्री रोजगार निर्मिती कार्यक्रमांतर्गत शेतकऱ्यांच्या कर्जप्रकरणातील अनुदानाची रक्कम त्यांच्या खात्यात जमा न करता ती स्वतःच्या खात्यात वर्ग करून घेतली. याप्रकरणी गंगापूर पोलीस ठाण्यात गुन्हा दाखल करण्यात आला असून, आर्थिक गुन्हे शाखेकडून अधिक तपास सुरू आहे.
कौटे यांनी ३६ खातेधारक शेतकऱ्यांची कर्जप्रकरणे मंजूर करताना संगनमताने बनावट कागदपत्रांच्या आधारे कर्जाची रक्कम कमी असताना ती जास्त असल्याचे दाखवले. तसेच, कर्ज खाते नसतानासुद्धा कर्ज खाते असल्याचे भासवून त्या खात्यात कर्जप्रकरणातील अनुदानाची रक्कम मंजूर केली. त्यानंतर, ही रक्कम कर्जदारांच्या बचत खात्यात वर्ग न करता स्वतःच्या खात्यात वर्ग करून घेतली.
फिर्यादी शाखाधिकारी बी. बी. बेहरा यांनी केलेल्या जोखीम आधारित लेखापरीक्षणात हा घोटाळा उघडकीस आला. त्यानंतर त्यांनी गंगापूर पोलीस ठाण्यात फिर्याद दिली. पोलिसांनी कौटे यांच्याविरुद्ध फसवणुकीचा गुन्हा दाखल केला आहे.
या गुन्ह्यात आणखी कोणाचा सहभाग आहे का आणि फसवणुकीचा आकडा यापेक्षा अधिक आहे का, याचा तपास आर्थिक गुन्हे शाखेकडून सुरू आहे. फसवणुकीची रक्कम वाढण्याची शक्यता पोलिसांनी वर्तवली आहे.
मुख्यमंत्री रोजगार निर्मिती या कार्यक्रमांतर्गत कर्जदाराला ५० लाख रुपयांपर्यंत कर्ज उपलब्ध करून दिले जाते. जिल्हाधिकारी कार्यालयामार्फत तपासणी व पडताळणी झाल्यावर संबंधितांचे कर्ज खाते बँक ऑफ महाराष्ट्रमध्ये सुरू करण्यात येते. या बँक खात्यात टप्प्याटप्प्याने तीन वर्षांसाठी कर्जाची रक्कम जमा होत असते. ही रक्कम कर्जदारांच्या कर्ज खात्यात जमा करण्याऐवजी कौटे यांनी बचत खात्यात जमा केली. या प्रकरणाचा पुढील तपास पोलीस निरीक्षक तृप्ती सोनवणे करत आहेत.
