संगमनेर, दि. ३ एप्रिल – प्रतिनिधी
सहकार महर्षी भाऊसाहेब थोरात सहकारी साखर कारखान्याच्या निवडणुकीसाठी उमेदवारी अर्ज दाखल करण्याच्या पहिल्याच दिवशी कारखान्याचे मुख्य मार्गदर्शक असलेले राज्याचे माजी मंत्री बाळासाहेब थोरात यांनी उमेदवारी अर्ज दाखल केला आहे.
थोरात यांनी गुरुवारी अनुक्रमे जोर्वे, साकुर आणि उत्पादक सहकारी संस्था, बिगर उत्पादक संस्था व पणन संस्था या तीन गटातून उमेदवारी अर्ज दाखल केले असल्याची माहिती निवडणूक निर्णय अधिकारी तथा संगमनेरचे प्रांताधिकारी शैलेश हिंगे यांनी दिली आहे. पहिल्याच दिवशी माजी मंत्री थोरात यांनी उमेदवारी अर्ज दाखल केल्याने कारखाना निवडणुकीने पहिल्याच दिवशी वेग पकडला आहे. विरोधकांनी कारखाना निवडणुकीसाठी उमेदवार देण्याची तयारी सुरू केली असून यावेळी निवडणूक रंगण्याची चिन्हे आहे.
स्थापनेपासून कारखाना दिवंगत नेते माजी आमदार स्वातंत्र्यसैनिक, भाऊसाहेब थोरात व त्यांच्यानंतर राज्याचे माजी मंत्री बाळासाहेब थोरात यांच्या अधिपत्याखाली सहकारामध्ये राज्यात दिशादर्शक काम करत आहे. सातत्याने दिलेला उच्च भाव आणि शेतकरी समोर ठेवून घेतलेले लोकाभिमुख निर्णय यामुळे कारखान्याने आत्तापर्यंत राज्यस्तरावर व राष्ट्रीय स्तरावर अनेक पारितोषिके मिळविले आहेत.
येत्या ११ मे रोजी थोरात सहकारी साखर कारखान्याची पंचवार्षिक निवडणूक होत आहे. या निवडणुकीसाठी उमेदवारी अर्ज दाखल करण्यास गुरुवारपासून प्रारंभ झाला आहे. उमेदवारी अर्ज दाखल करण्याच्या पहिल्याच दिवशी थोरात यांनी उमेदवारी अर्ज दाखल करत विरोधकांना थेट आव्हान दिले आहे.
कारखाना निवडणुकीत थोरात गटाकडून यावेळी कोणाला संधी दिली जाते याची उत्सुकता असून विधानसभेतील पराभवानंतर थोरात प्रथमताच कारखान्यात देखील भाकरी फिरविण्याची शक्यता व्यक्त केली जात आहे. त्यामुळे थोरात यांच्या नेतृत्वासमोर टिकणारे उमेदवार उभे देणे विरोधकांसाठी सध्या तरी आव्हान बनले आहे. उमेदवारी अर्ज मागे घेण्याच्या अखेरच्या दिवसानंतर या निवडणुकीचे चित्र स्पष्ट होईल. सध्या तरी थोरात यांनी ही निवडणूक प्रतिष्ठेची बनविले असल्याचे दिसत असून त्या दृष्टीने त्यांनी तयारी केली आहे.
