पुणे, दि. ६ एप्रिल –
लाचेची रक्कम स्वीकारून पळून जाण्याचा प्रयत्न करणाऱ्या एका महिला पोलीस कर्मचाऱ्याला लाचलुचपत प्रतिबंधक विभागाने (एसीबी) सापळा रचून अटक केली आहे. ही कारवाई शनिवारी (५ एप्रिल) पिंपरी न्यायालयाच्या बाहेर करण्यात आली.
रेश्मा बाळू नाईकरे (वय ३२) असे लाच घेणाऱ्या महिला पोलीस शिपायाचे नाव आहे. त्या भोसरी पोलीस ठाण्यात कार्यरत आहेत. या प्रकरणी एका ३५ वर्षीय व्यक्तीने एसीबीकडे तक्रार दाखल केली होती.
तक्रारदाराच्या माहितीनुसार, त्यांचा दूध विक्रीचा व्यवसाय आहे आणि त्यांची डेअरी रात्री उशिरापर्यंत सुरू राहत होती. त्यामुळे भोसरी पोलीस ठाण्यात त्यांच्याविरुद्ध गुन्हा दाखल झाला होता. हा खटला न्यायालयात न पाठवण्यासाठी आणि कोणताही दंड न आकारण्यासाठी पोलीस शिपाई नाईकरे यांनी तक्रारदाराकडे सुरुवातीला दोन हजार रुपयांची मागणी केली होती. मात्र, तडजोडीअंती एक हजार रुपये लाच घेण्यास त्या तयार झाल्या.
शनिवारी, नाईकरे यांनी भोसरी पोलीस ठाण्याच्या परिसरात तक्रारदाराकडून एक हजार रुपयांची लाच स्वीकारली. रक्कम घेतल्यानंतर त्या पळून जाण्याचा प्रयत्न करत असतानाच, एसीबीच्या पथकाने पिंपरी न्यायालयाच्या बाहेरील रस्त्यावर त्यांना पकडले. या कारवाईनंतर पोलीस शिपाई रेश्मा नाईकरे यांच्यावर गुन्हा दाखल करण्याची प्रक्रिया सुरू होती.
दरम्यान, लाचलुचपत प्रतिबंधक विभागाने नागरिकांना आवाहन केले आहे की, कोणत्याही शासकीय अधिकारी किंवा कर्मचाऱ्याने शासकीय काम करण्यासाठी लाचेची मागणी केल्यास त्यांनी तात्काळ एसीबीशी संपर्क साधावा.
ही कारवाई एसीबी पुणे परिक्षेत्राचे पोलीस अधीक्षक शिरीष सरदेशपांडे, पुणे विभागाच्या अपर पोलीस अधीक्षक डॉ. शीतल जानवे-खराडे, विजय चौधरी, उपअधीक्षक दयानंद गावडे यांच्या मार्गदर्शनाखाली पोलीस निरीक्षक अमोल भोसले, पोलीस अंमलदार कोमल शेटे, अश्विन कुमकर, दीपक काकडे यांच्या पथकाने यशस्वीपणे पार पाडली.
