जेसीबी चालकाचा हात, पाय आणि मुंडक्याविना मृतदेह; अवयवांच्या शोधासाठी ड्रोनची मदत हत्येचा संशय, अज्ञात व्यक्तीविरुद्ध गुन्हा दाखल

पुणे, दि. ७ एप्रिल
पुण्याच्या पिंपरी-चिंचवडमधून एक धक्कादायक बातमी समोर येत आहे. दिघी पोलिसांनी मोशीतील एका दगडाच्या खाणीत एका व्यक्तीचा हात, पाय आणि मुंडक नसलेला मृतदेह शोधून काढला आहे. या घटनेमुळे परिसरात खळबळ माजली आहे. पोलिसांनी प्राथमिक माहितीच्या आधारावर अज्ञात व्यक्तीविरुद्ध हत्येचा गुन्हा दाखल केला आहे.
मृतदेहाची ओळख पटली असून सीताराम ढाले असे मृत व्यक्तीचे नाव आहे. ते जेसीबी चालक होते. मिळालेल्या प्राथमिक माहितीनुसार, सीताराम ढाले २९ मार्च रोजी घरातून कामासाठी निघाले होते. सीसीटीव्ही फुटेजमध्ये ते मोशीतील दगडाच्या खाणीच्या दिशेने जाताना दिसले होते. मात्र, ते घरी परतले नाहीत. त्यामुळे त्यांच्या पत्नीने ३१ मार्च रोजी भोसरी पोलीस ठाण्यात ते बेपत्ता असल्याची तक्रार दाखल केली होती.
तीन दिवसांनंतर, मोशी येथील सुमारे १०० फूट खोल असलेल्या दगडाच्या खाणीत एका व्यक्तीचा धड सापडला, ज्याला हात, पाय आणि मुंडके नव्हते. दिघी पोलिसांनी तातडीने घटनास्थळी धाव घेतली. मृतदेह कुजलेल्या अवस्थेत होता. त्यांनी तात्काळ याची माहिती जवळच्या पोलीस ठाण्यांना दिली. त्यानंतर, भोसरी पोलिसांनी बेपत्ता असलेल्या सीताराम यांच्या पत्नी आणि नातेवाईकांना घटनास्थळी बोलावले.
घटनास्थळावर सापडलेला मोबाईल फोन आणि कपड्यांवरून मृतदेहाची ओळख सीताराम ढाले म्हणून झाली. प्राथमिक तपासात हा खून असल्याचा संशय पोलिसांना आला आणि ४ एप्रिल रोजी दिघी पोलीस ठाण्यात अज्ञात व्यक्तीविरुद्ध खुनाचा गुन्हा दाखल करण्यात आला.
सीताराम यांचा मृतदेह हात, पाय आणि मुंडक्याशिवाय आढळल्याने अनेक प्रश्न उभे राहिले आहेत. हे अवयव कापले गेले आहेत की एखाद्या हिंस्र प्राण्याने खाल्ले आहेत, याबाबत अद्याप कोणतीही माहिती समोर आलेली नाही. दिघी पोलीस या प्रकरणाचा कसून तपास करत आहेत. गायब झालेले अवयव शोधण्यासाठी पोलिसांनी ड्रोनची मदत घेतली, परंतु ते अद्याप सापडलेले नाहीत.
सीताराम यांचे कोणाशीही वाद किंवा वैर नव्हते, अशी माहिती त्यांच्या कुटुंबीयांनी दिली आहे. त्यामुळे ही हत्या आहे की आत्महत्या, किंवा ते चुकून खाणीत पडले, या सर्व शक्यतांचा पोलीस बारकाईने तपास करत आहेत.