नाशिकमध्ये अनधिकृत दर्गा तोडण्यास सुरुवात, दगडफेक आणि तोडफोडीमुळे तणाव

महाराष्ट्र संवाद न्यूज – नाशिक
शहरातील काठे गल्ली परिसरात असलेल्या एका अनधिकृत दर्ग्याच्या उर्वरित बांधकामावर आज पहाटेपासून अतिक्रमण काढण्याची कारवाई सुरू करण्यात आली आहे. या कारवाईदरम्यान रात्रीच्या सुमारास अज्ञात व्यक्तींकडून पोलिसांवर दगडफेक करण्यात आली, यात तीन ते चार पोलीस जखमी झाले असून पाच वाहनांचे नुकसान झाले आहे. यामुळे परिसरात तणावाचे वातावरण निर्माण झाले आहे.
मिळालेल्या माहितीनुसार, या अनधिकृत दर्गा ट्रस्टला आपले म्हणणे मांडण्यासाठी दिलेली मुदत आज, १५ एप्रिल रोजी संपली. यानंतर नाशिक महानगरपालिकेने (NMC) मोठा पोलीस बंदोबस्त तैनात करून उर्वरित बांधकाम तोडण्यास सुरुवात केली. यापूर्वी याच दर्ग्यावर कारवाई करताना कायदा व सुव्यवस्थेचा प्रश्न निर्माण झाला होता, त्यामुळे पोलिसांनी कोणतीही अनुचित घटना घडू नये यासाठी अतिरिक्त कुमक मागवली आहे.
कारवाई सुरू असलेल्या ठिकाणी १०० मीटरच्या परिसरात बॅरिकेडिंग करण्यात आले असून कोणालाही आत जाण्याची परवानगी नाही. प्रशासनाकडून आज दुपारपर्यंत हे अनधिकृत बांधकाम पूर्णपणे हटवले जाईल, अशी शक्यता वर्तवण्यात येत आहे.
दरम्यान, तोडक कारवाई सुरू होण्यापूर्वी रात्रीच्या वेळी काठे गल्ली परिसरात वीजपुरवठा खंडित झाल्यानंतर काही जमावाने पोलिसांवर दगडफेक केली. या घटनेत काही पोलीस कर्मचारी जखमी झाले असून सार्वजनिक मालमत्तेचेही नुकसान झाले आहे. वादग्रस्त धार्मिक स्थळाबाबत पसरलेल्या अफवांमुळे परिसरात तणाव निर्माण झाला होता.
नाशिक महानगरपालिकेने न्यायालयाच्या आदेशानुसार या अनधिकृत दर्ग्याला १ एप्रिल रोजी नोटीस बजावली होती. स्वतःहून बांधकाम हटवण्याचे निर्देश देण्यात आले होते, अन्यथा तोडक कारवाईचा इशारा दिला होता. परिस्थिती नियंत्रणात ठेवण्यासाठी नाशिक पोलिसांनी परिसरातील वाहतूक मार्गातही बदल केला आहे.