संगमनेरात तरुणावर प्राणघातक हल्ला; डोक्यात दगड मारून जीवे मारण्याचा प्रयत्न, परिसरात दहशतीचे वातावरण

महाराष्ट्र संवाद न्यूज – संगमनेर

शहरातील अकोले नाका परिसरात शनिवारी (दि. १९) सायंकाळी साडेसात वाजेच्या सुमारास एका तरुणावर चार जणांच्या टोळक्याने प्राणघातक हल्ला चढवला. नीलेश सोमनाथ मंडलिक (वय ३६, रा. ढोलेवाडी) असे गंभीर जखमी झालेल्या तरुणाचे नाव आहे. हल्लेखोरांनी त्यांना बेदम मारहाण करत डोक्यात दगड मारून जीवे मारण्याचा प्रयत्न केला. या घटनेमुळे परिसरात एकच खळबळ उडाली असून नागरिकांमध्ये भीतीचे वातावरण निर्माण झाले आहे.

याप्रकरणी संगमनेर शहर पोलीस ठाण्यात अनिकेत मंडलिक (रा. माळीवाडा, संगमनेर), साई सूर्यवंशी, अक्षय चव्हाण (दोघेही रा. अकोले नाका) आणि एका अनोळखी व्यक्ती अशा चार जणांविरुद्ध भारतीय न्याय संहितेच्या विविध कलमांन्वये गुन्हा दाखल करण्यात आला आहे.

सचिन भाऊसाहेब नाईक (वय ३८, रा. कासारा दुमाला, संगमनेर) यांनी यासंदर्भात पोलिसात फिर्याद दाखल केली आहे. जखमी नीलेश मंडलिक हे फिर्यादी सचिन नाईक यांचे मामाचे मुलगे आहेत. तक्रारीत नमूद केल्यानुसार, नीलेश मंडलिक यांना जीवे ठार मारण्याच्या उद्देशाने ही मारहाण करण्यात आली.

नीलेश मंडलिक यांना आरोपींनी लाथाबुक्क्यांनी जबर मारहाण केली. त्यानंतर त्यांनी दगडाने नीलेश यांच्या डोक्यात गंभीर वार केले. मारहाणीच्या वेळी नीलेश यांनी मदतीसाठी आरडाओरड केली. रस्त्याने ये-जा करणारे लोक आणि परिसरातील दुकानदारांकडे त्यांनी मदतीची याचना केली. मात्र, हल्लेखोरांनी मदतीसाठी धावून येणाऱ्या लोकांना ‘कोणी मध्ये पडला तर त्याला आम्ही मारून टाकू’ अशी धमकी दिली. यामुळे कोणीही मदतीसाठी पुढे येण्याचे धाडस केले नाही.

अकोले नाका परिसरात या मारहाण करणाऱ्यांची मोठी दहशत आहे. त्यांच्या या गुंडगिरीमुळे परिसरातील दुकानदारांनी आपली दुकाने तत्काळ बंद करून घेतली, तर रस्त्याने ये-जा करणारे नागरिक त्यांना पाहून सैरावैरा पळत होते. या घटनेमुळे परिसरात भीती आणि दहशतीचे वातावरण पसरले आहे.

गंभीर जखमी नीलेश मंडलिक यांच्यावर शहरातील एका खासगी रुग्णालयात उपचार सुरू आहेत. त्यांची प्रकृती चिंताजनक असल्याचे सांगण्यात येत आहे. संगमनेर शहर पोलिसांनी या घटनेची गंभीर दखल घेतली असून, आरोपींचा शोध घेण्यासाठी पथके रवाना केली आहेत. लवकरच आरोपींना अटक करण्यात येईल, असे आश्वासन पोलिसांनी दिले आहे. या घटनेमुळे संगमनेर शहरात कायदा आणि सुव्यवस्थेचा प्रश्न ऐरणीवर आला असून, नागरिकांमध्ये असुरक्षिततेची भावना निर्माण झाली आहे. पोलीस या प्रकरणी अधिक तपास करत आहेत.