मालपाणी उद्योग समूहाचा सामाजिक बांधिलकीतून उपक्रम; येत्या बुधवारी ३५ जोडप्यांचा शुभविवाह

महाराष्ट्र संवाद न्यूज – संगमनेर
येथील प्रतिष्ठित मालपाणी उद्योग समूहाच्या वतीने आयोजित सर्वधर्मीय सामुदायिक विवाह सोहळ्याची जय्यत तयारी पूर्ण झाली आहे. येत्या बुधवारी (३० एप्रिल) अक्षय्य तृतीयेच्या शुभदिनी हा सोहळा मालपाणी लॉन्स येथे संपन्न होणार असून, यात हिंदू आणि बौद्ध धर्मातील एकूण ३५ नववधू आणि वर विवाहबद्ध होणार आहेत.
सामाजिक दायित्वाच्या भावनेतून मालपाणी उद्योग समूहाने गेली २८ वर्षे हा स्तुत्य उपक्रम अविरतपणे सुरू ठेवला आहे. यावर्षी केवळ एक रुपया नोंदणी शुल्कात ३५ जोडप्यांनी या सोहळ्यात सहभागी होण्यासाठी उत्स्फूर्त प्रतिसाद दिला आहे.
या विवाह सोहळ्याला प्रमुख पाहुणे म्हणून राज्याचे जलसंपदा व पालकमंत्री राधाकृष्ण विखे पाटील, खासदार भाऊसाहेब वाकचौरे, आमदार सत्यजीत तांबे, आमदार अमोल खताळ, माजी मंत्री बाळासाहेब थोरात, माजी खासदार डॉ. सुजय विखे पाटील यांच्यासह अनेक मान्यवर उपस्थित राहून नवदांपत्यांना आशीर्वाद देणार आहेत.
सोहळ्यासाठी भव्य व्यवस्था… मालपाणी लॉन्सचा परिसर नववधू आणि वरांच्या स्वागतासाठी आकर्षक कमानी व फुलांनी सजवण्यात आला आहे. विवाहस्थळी येणाऱ्या पाहुण्यांना मार्गदर्शन व माहिती देण्यासाठी स्वागत कक्ष तसेच चौकशी कक्षाची स्थापना करण्यात आली आहे. उन्हाळ्याच्या तीव्रतेपासून बचाव करण्यासाठी विवाह मंडपाच्या संपूर्ण परिसरात मंडप उभारण्यात आला आहे, तसेच शीतल हवा आणि आरामदायक वातावरणासाठी वातानुकूलित यंत्रणा बसवण्यात आली आहे. एकाच वेळी हजारो पाहुण्यांच्या भोजनाची उत्तम व्यवस्था करण्यात आली असून, वरांची पारंपरिक मिरवणूक काढण्यासाठी आकर्षक वाहने सज्ज ठेवण्यात आली आहेत. दुपारच्या सत्रात पाहुण्यांच्या मनोरंजनासाठी सदाबहार गाण्यांच्या मैफिलीचे आयोजनही करण्यात आले आहे.
दुपारी साडेचार वाजता शुभमुहूर्त… या सामुदायिक विवाह सोहळ्याला बुधवारी दुपारी साडेचार वाजता प्रारंभ होणार आहे. हा विवाह सोहळा अत्यंत देखणा, आकर्षक आणि अविस्मरणीय व्हावा यासाठी विविध समित्या कार्यरत आहेत. मालपाणी उद्योग समूहाच्या वतीने विवाहबंधनात अडकणाऱ्या प्रत्येक नवदाम्पत्याला सुमारे २५ हजार रुपये किंमतीच्या संसारोपयोगी वस्तू भेट म्हणून देण्यात येणार आहेत.
या भव्य आणि सामाजिक बांधिलकी जपणार्‍या सोहळ्याला उपस्थित राहून नववधू-वरांना आशीर्वाद द्यावेत, असे आवाहन मालपाणी उद्योग समूहाचे मनीष मालपाणी यांनी केले आहे.