युवतीच्या नावे बनावट इंस्टाग्राम अकाउंट; नातेवाईक आणि मित्रांना मेसेज पाठवून बदनामी

महाराष्ट्र संवाद न्यूज – 

अहिल्यानगर शहरातील बागडपट्टी भागात राहणाऱ्या एका २२ वर्षीय युवतीच्या नावाने अज्ञात व्यक्तीने बनावट इंस्टाग्राम अकाउंट तयार करून तिची समाजात बदनामी केल्याची धक्कादायक घटना उघडकीस आली आहे.

या बनावट खात्यावरून युवतीच्या नातेवाईकांना आणि मित्रमैत्रिणींना आक्षेपार्ह मेसेज पाठवण्यात आले, यामुळे तिची आणि तिच्या कुटुंबाची प्रतिष्ठा धोक्यात आली आहे. या गंभीर प्रकारणी पीडित युवतीने मंगळवारी (२९ एप्रिल) येथील सायबर पोलीस ठाण्यात धाव घेऊन तक्रार दाखल केली आहे. पोलिसांनी अज्ञात व्यक्तीविरुद्ध भारतीय न्याय संहिता कलम ३५६ (२) (अब्रुनुकसानी) आणि माहिती तंत्रज्ञान कायदा कलम ६६ (सी) अंतर्गत गुन्हा नोंदवला आहे.

युवतीने आपल्या फिर्यादीत नमूद केले आहे की, एका अज्ञात व्यक्तीने तिच्या नावाने इंस्टाग्रामवर बनावट खाते उघडले. या खात्यावर तिचे छायाचित्र आणि इतर माहितीचा वापर करून तिच्या जवळच्या लोकांना बदनामीकारक संदेश पाठवले गेले. या कृत्यामुळे समाजात तिची प्रतिमा मलिन झाली असून तिला मानसिक त्रास सहन करावा लागत आहे.

हा प्रकार ११ जानेवारी २०२५ पूर्वी घडला असल्याचे फिर्यादीत नमूद आहे. पीडितेने या संदर्भात २९ एप्रिल रोजी सायबर पोलीस ठाण्यात तक्रार दाखल केल्यानंतर पोलिसांनी तातडीने दखल घेत गुन्हा नोंदवला आहे. या प्रकरणाचा पुढील तपास पोलीस निरीक्षक मोरेश्वर पेंदाम यांच्या मार्गदर्शनाखाली सुरू आहे.

दरम्यान, पोलिसांनी नागरिकांना समाजमाध्यमांचा वापर करताना अत्यंत सावधगिरी बाळगण्याचे आवाहन केले आहे. तसेच, जर कोणाला अशा प्रकारचे संशयास्पद किंवा बदनामीकारक कृत्य निदर्शनास आल्यास, त्यांनी त्वरित सायबर पोलीस ठाण्याशी संपर्क साधावा, असे आवाहनही करण्यात आले आहे. या घटनेमुळे अहिल्यानगर शहरात खळबळ उडाली असून सायबर गुन्हेगारांवर कठोर कारवाई करण्याची मागणी होत आहे.