विशेष प्रतिनिधी/ मुंबई
शिर्डीच्या साई संस्थानला धमकीचा मेल आल्याने खळबळ उडाली आहे. साईबाबा मंदिर पाईप बॉम्बने उडवून देण्याची धमकी मेलद्वारे साई संस्थानला देण्यात आली आहे. अजित जक्कुमोल्ला या नावाने हा मेल साई संस्थानाला पाठवण्यात आला असून याचा आईपी कर्नाटकमधील असल्याचं सांगितलं जातं आहे. काल २ मे रोजी धमकीचा मेल साई संस्थानला प्राप्त झाल्यानंतर साई संस्थाननं आपली सुरक्षा दक्ष केली आहे.
या धमकीच्या मेलमध्ये प्रामुख्यानं फर्स्ट पहलगाम नेक्स्ट शिर्डी, असं लिहिलं आहे. तामिळनाडूमधील जफ्फार सादीक आणि जफ्फार सईद यांची गुन्हातून मुक्तता करण्यात यावी, असंही लिहिलं आहे. दरम्यान, साई संस्थानाला आलेल्या या धमकीच्या मेलची पुष्टी संस्थान प्रशासनाकडून करण्यात आली असून याबाबत शिर्डी पोलीस ठाण्यात भारतीय न्याय संहिता ३५१(४) प्रमाणे गुन्हा दाखल करण्यात आला आहे. साई संस्थान सुरक्षा, महाराष्ट्र पोलीस, एमएसएफ सुरक्षा अलर्ट करण्यात आल्याचं साई संस्थानकडून स्पष्ट करण्यात आलं आहे.
यापूर्वी देखील साई संस्थानला धमकीचे मेल, पत्र आलेली होती. त्यावेळी पोलीस तपासात हे मेल आणि पत्र फेक निघाले होते. मात्र, आता जम्मू-काश्मीरमधील पहलगाम येथे २२ एप्रिल रोजी झालेल्या दहशतवादी हल्ल्याच्या पार्श्वभूमीवर देशातील वातावरण ढवळून निघाले असताना साई संस्थानला पुन्हा धमकीचा मेल आल्याने एकच खळबळ उडाली आहे. साई संस्थानसह पोलीस यंत्रणा अलर्ट मोडवरती आल्या आहेत.
