महाराष्ट्र संवाद न्यूज – अहिल्यानगर
पोलिस अधीक्षक राकेश ओला यांच्या थेट आदेशानंतर स्थानिक गुन्हे शाखेच्या (एलसीबी) पथकांनी जिल्ह्यात अवैध धंद्यांविरुद्ध जोरदार मोहीम उघडली आहे. एकाच वेळी जिल्ह्यातील २३ ठिकाणी धाडी टाकून एलसीबीने अवैध व्यावसायिकांचे धाबे दणाणून सोडले आहेत. या धडक कारवाईत अवैध दारू विक्री, जुगार आणि इतर अवैध धंद्यांमध्ये गुंतलेल्या ३४ आरोपींना अटक करण्यात आली असून, तब्बल २ लाख ८३ हजार ८७५ रुपयांचा मुद्देमाल जप्त करण्यात आला आहे. एलसीबीच्या या ‘सर्जिकल स्ट्राईक’मुळे जिल्ह्यातील अवैध धंदे चालवणाऱ्यांमध्ये मोठी खळबळ उडाली आहे.
पोलिस अधीक्षक राकेश ओला यांनी जिल्ह्यातील अवैध धंद्यांचे समूळ उच्चाटन करण्याचे निर्देश दिल्यानंतर, स्थानिक गुन्हे शाखेचे निरीक्षक दिनेश आहेर यांनी तातडीने हालचाल करत पाच विशेष पथके तयार केली. या पथकांनी अहिल्यानगर तालुका, श्रीरामपूर शहर, नेवासे, श्रीगोंदे आणि राहुरी पोलिस ठाण्याच्या हद्दीत एकाच वेळी २३ ठिकाणी धाडी टाकल्या.
एलसीबीच्या पथकांनी केलेल्या या कारवाईत प्रामुख्याने अवैध दारू विक्रीच्या अड्ड्यांवर मोठी कारवाई करण्यात आली. यासोबतच जुगार खेळणाऱ्यांवर आणि इतर अवैध धंद्यांमध्ये सहभागी असलेल्यांवरही गुन्हे दाखल करण्यात आले आहेत. जप्त करण्यात आलेल्या मालामध्ये मोठ्या प्रमाणात अवैध दारू आणि जुगाराच्या साहित्याचा समावेश आहे.
गेल्या काही दिवसांपासून जिल्ह्यात अवैध धंद्यांचे प्रमाण वाढले होते. अनेक गावांमध्ये खुलेआम दारू विक्री होत असल्याच्या तक्रारी नागरिकांकडून येत होत्या. मात्र, स्थानिक पोलिसांकडून अपेक्षित कारवाई होत नसल्याने नागरिकांमध्ये नाराजी होती. अशा परिस्थितीत एलसीबीने केलेली ही मोठी कारवाई निश्चितच दिलासा देणारी आहे.
या यशस्वी कारवाईत पोलिस निरीक्षक दिनेश आहेर यांच्या मार्गदर्शनाखाली पोलिस अंमलदार बापूसाहेब फोलाणे, शाहीद शेख, गणेश धोत्रे, मयूर गायकवाड, रोहित येमूल, गणेश भिंगारदे, मनोहर गोसावी, भगवान थोरात, रमीजराजा आत्तार, सुनील मालणकर, अरुण गांगुर्डे, सोमनाथ झांबरे, अशोक लिपणे, किशोर शिरसाठ, अतुल लोटके यांच्यासह इतर कर्मचाऱ्यांनी सक्रिय सहभाग घेतला.
एलसीबीच्या या धडक कारवाईमुळे जिल्ह्यातील अवैध धंदे काही प्रमाणात नियंत्रणात येण्याची शक्यता आहे. मात्र, नागरिकांकडून ही कारवाई अधिक व्यापक आणि नियमित करण्याची मागणी होत आहे, जेणेकरून अवैध धंद्यांचे जाळे पूर्णपणे उद्ध्वस्त होईल. एलसीबीने दाखवलेल्या या धडाकेबाज कामगिरीचे सर्वत्र कौतुक होत आहे.
