अवैध जुगार अड्ड्यांवर एलसीबीचा छापा; पतसंस्थेचा व्हाईस चेअरमन, आजी-माजी पदाधिकारी ताब्यात, 2.27 लाखांचा मुद्देमाल जप्त

अहिल्यानगर –
एमआयडीसी परिसरात सुरू असलेल्या दोन अवैध जुगार अड्ड्यांवर स्थानिक गुन्हे शाखेच्या पोलिसांनी रविवारी मोठी कारवाई केली. या कारवाईत पोलिसांनी 17 जुगार खेळणाऱ्यांना ताब्यात घेतले असून त्यांच्याकडून 2 लाख 27 हजार 930 रुपयांचा मुद्देमाल जप्त करण्यात आला आहे. विशेष म्हणजे, पकडलेल्यांमध्ये एका पतसंस्थेच्या व्हाईस चेअरमन आणि वडगाव गुप्ता ग्रामपंचायतीच्या आजी व माजी पदाधिकाऱ्यांचा समावेश असल्याने या कारवाईची परिसरात जोरदार चर्चा सुरू आहे.
पोलिस अधीक्षक राकेश ओला यांच्या आदेशानुसार, पोलीस निरीक्षक दिनेश आहेर यांच्या नेतृत्वाखाली स्थानिक गुन्हे शाखेच्या दोन पथकांनी ही कारवाई केली. पथकांनी एमआयडीसी पोलीस ठाण्याच्या हद्दीतील सह्याद्री चौक ते चाकण ऑईल मिल रस्त्यालगतच्या हॉटेल जनता दरबारच्या मागील पटांगणात आणि वडगाव गुप्ता ते शेंडी जाणार्‍या रस्त्यालगतच्या उघडमळा शेतजमिनीत एकाच वेळी छापे टाकले.
याप्रकरणी एमआयडीसी पोलीस ठाण्यात दोन स्वतंत्र गुन्हे दाखल करण्यात आले असून पोलिसांनी ताब्यात घेतलेल्या 17 जणांची नावे पुढीलप्रमाणे – किरण प्रभाकर पानपाटील (रा. भिंगार), अविनाश माणिक भोसले (रा. पाथर्डी), एकनाथ केरू कोतकर (रा. इसळक, ता. अहिल्यानगर), प्रदीप भाऊसाहेब कोहोक (रा. दौलावडगाव, नागापूर), महेंद्र शिवराय कदम (रा. नवनागापूर), रवींद्र रावसाहेब साळवे (रा. माळीवाडा), अनिल चंदू मके (रा. निंबळक, ता. अहिल्यानगर), विशाल भाऊसाहेब पाटोळे (रा. नागापूर), नीलेश भालचंद्र भाकरे (रा. नागापूर), चंद्रकांत बबन आंबेडकर (रा. माळवाडी, वडगाव गुप्ता), राजेंद्र शिवराम कदम (रा. वडगाव गुप्ता), सावता आष्टीम चव्हाण (रा. माळवाडी, वडगाव गुप्ता), भाऊसाहेब रामचंद्र वरूटे (रा. भैरवनाथ मंदिराजवळ, वडगाव गुप्ता), शंकर रामभाऊ धुमाळ (रा. धुमाळ वस्ती, वडगाव गुप्ता), नारायण धोंडीराम शिंदे (रा. भैरवनाथ मंदिराजवळ, वडगाव गुप्ता), भाऊराव लहानु शिंदे (वडगाव गुप्ता), हुसेन गुलाब सय्यद (रा. वडगाव गुप्ता).
या घटनेचा पुढील तपास एमआयडीसी पोलीस करत आहेत.