संगमनेर – प्रतिनिधी
महाराष्ट्र विधानमंडळाच्या अत्यंत महत्त्वाच्या आणि जबाबदारीच्या लोकलेखा समितीवर (Public Accounts Committee) आमदार सत्यजीत तांबे यांची निवड झाली आहे. त्यांच्या अभ्यासू वृत्ती, प्रभावी मांडणी आणि युवा नेतृत्वामुळे ही निवड विशेष लक्षवेधी ठरली आहे.
विधानमंडळ सचिवालयाने जारी केलेल्या पत्रकानुसार, आमदार तांबे यांची लोकलेखा समितीवर अधिकृत नियुक्ती करण्यात आली आहे. ही समिती राज्य सरकारच्या खर्चावर, आर्थिक निर्णयांवर आणि नियंत्रक व महालेखापरीक्षक (CAG) यांच्या अहवालावर आधारित चौकशी करून शिफारसी करते. विरोधी पक्षनेते आमदार विजय वडेट्टीवार हे या समितीचे अध्यक्ष आहेत.
युवा नेतृत्वाचे प्रतिनिधित्व करणाऱ्या तांबे यांच्यावर राज्याच्या आर्थिक पारदर्शकतेची मोठी जबाबदारी आली आहे. त्यांनी यापूर्वी विधान परिषदेत कायदा, आरोग्य, शिक्षण, शेती, पदवीधरांचे प्रश्न, विनाअनुदानित संस्था आणि डॉक्टर, वकील, इंजिनीअर यांच्याशी संबंधित अनेक मुद्दे अभ्यासपूर्ण पद्धतीने मांडले आहेत.
नाशिक पदवीधर मतदारसंघाचे प्रतिनिधित्व करताना त्यांनी पाच जिल्ह्यांतील ५४ तालुक्यांमध्ये प्रभावी काम करून मतदारांचा विश्वास संपादन केला आहे. त्यांची ही निवड त्यांच्या जनसंपर्क, सर्वसामान्यांशी बांधिलकी आणि विधिमंडळातील सक्रिय सहभागाचा एक महत्त्वाचा टप्पा आहे.
स्वातंत्र्यसैनिक भाऊसाहेब थोरात यांच्या परंपरेचा वारसा जपत, माजी मंत्री बाळासाहेब थोरात आणि माजी आमदार डॉ. सुधीर तांबे यांच्या मार्गदर्शनाखाली सत्यजीत तांबे यांनी सामाजिक, शैक्षणिक आणि युवा विकासाला प्राधान्य दिले. त्यांचे नेतृत्व, प्रभावी संवाद कौशल्य आणि सर्वपक्षीय नेत्यांशी चांगले संबंध हे त्यांचे वैशिष्ट्य आहे.
सत्यजीत तांबे यांची लोकलेखा समितीवर झालेली निवड त्यांच्या कार्यक्षमतेचा गौरव आहे आणि महाराष्ट्रातील युवा नेतृत्वाला मिळालेली मोठी संधी आहे. त्यांच्या निवडीचे उत्तर महाराष्ट्रात मोठ्या उत्साहात स्वागत होत आहे.
